महाबळेश्वर : महाबळेश्वर येथे सक्रिय कोरोनारुग्णांची संख्या एक असून हा एकमेव कोरोना रुग्ण पाचगणी येथे उपचार घेत आहे. आज शहरात एकही कोरोना बाधित रुग्ण नाही, त्यामुळे महाबळेश्वर शहर कोरोनामुक्तीच्या मार्गावर आहे, असे म्हटले तर वावगे ठरणार नाही. पर्यटनस्थळ हे पर्यटकांसाठी खुले करावे, अशी मागणी शहरात जोर धरू लागली आहे.
दोन दिवसांपूर्वी गवळी आळी येथील एका महिलेला कोरोनाचा संसर्ग झाला. या महिलेला उपचारासाठी आता पाचगणी येथे दाखल करण्यात आले आहे. या एका रुग्णामुळे शहरात कोरोना झालेल्या रुग्णांची एकूण संख्या ७८१ झाली आहे. यापैकी २२ रुग्णांना आपले प्राण गमवावे लागले आहेत, तर ७५८ रुग्ण आजअखेर कोरोनातून बरे झाले आहेत. सक्रिय रुग्णसंख्या १ आहे. शहरातील ४५ वर्षांवरील नागरिकांची संख्या ३०९९ असून, यापैकी १९५५ नागरिकांनी कोरोना लसीचा पहिला तर ६२१ नागरिकांनी दोन्ही डोस घेतले आहेत. शहरातील १८ ते ४४ या वयोगटातील व्यक्तींची संख्या ५०२१ असून, यापैकी १०१७ व्यक्तींनी कोरोना लसीचा पहिला डोस घेतलेला आहे. रोज ठराविक लसी उपलब्ध होत असून लसीकरणाचा वेग मंदावलेला आहे. दरम्यान, पालिकेतील ३२१ कर्मचाऱ्यांनी कोरोना लसीचे दोन्ही डोस घेतले असल्याची माहिती पालिकेच्या मुख्याधिकारी पल्लवी पाटील यांनी दिली.
सातारा जिल्हा हा कोरोना संसर्गाच्या चौथ्या टप्प्यात असला तरी महाबळेश्वर शहर हे कोरोनामुक्तीच्या मार्गावर आहे. आता प्रशासनाने महाबळेश्वरबाबत नव्याने विचार करणे आवश्यक आहे. महाबळेश्वर व पाचगणी ही दोन्ही थंड हवेची ठिकाणं ही पर्यटनावर अवलंबून आहेत.
चौकट..
लाॅकडाऊनमुळे आर्थिक गणित कोलमडले...
वीकेंडला महाबळेश्वर शहर वगळता तालुक्यात मोठ्या प्रमाणावर पर्यटक दाखल झाले होते. या पर्यटकांना शहरात प्रवेश मिळत नसला तरी शहरालगत असेलेल्या नागरी वसाहतीमध्ये पर्यटकांना निवासासह सर्व सोयीसुविधा मिळत आहेत. अशा स्थितीत शहरात कोरोना नियमांचे कोटकोरपणे पालन करणाऱ्या सर्व व्यावसायिकांवर व नागरिकांवर हा अन्याय आहे. लाॅकडाऊनमुळे सर्वांचे आर्थिक गणित कोलमडले आहे. अशा स्थितीत प्रशासनाने शहरातील नागरिकांना वेठीस त्यांचा अंत पाहू नये. महाबळेश्वर व पाचगणी ही दोन्ही पर्यटनस्थळे सुरू करण्यात यावी, अशी मागणी जोर धरू लागली आहे.