वडूज : नेर येथील एका कुटुंबातील कोरोनाबाधित व्यक्तीच्या संपर्कामुळे एका विद्यालयातील पाच विद्यार्थी बाधित सापडले. यामुळे शाळा बंद केली आहे.
शाळा केव्हा सुरू करायची याबाबतचा निर्णय शाळा व्यवस्थापन समितीच्या सोमवारी होणाऱ्या बैठकीत घेण्यात येणार आहे. दरम्यान, शाळेतील ३७३ विद्यार्थी, २३ शिक्षकांची तपासणी केली.
दरम्यान, कोरोनाबाधित विद्यार्थ्यांच्या संख्येबाबत सध्या सुरू असलेल्या उलटसुलट चर्चांवर विश्वास न ठेवता पालकांनी मुलांच्या आरोग्याबाबत अधिक दक्षता घ्यावी, असे आवाहन शाळा प्रशासनाने केले आहे.
याबाबत माहिती अशी की, नेर येथील एका मुलीचे आजोबा बाधित असल्याचे आढळून आल्यानंतर त्या कुटुंबाची कोरोना तपासणी करण्यात आली. त्यात या कुटुंबातील मुलगीही बाधीत आढळली. शाळा सुरू झाल्यापासून शासनाच्या निर्देशानुसार कोरोनाचा प्रसार रोखण्यासाठी विद्यालयातर्फे दररोज दक्षता घेतली जाते. तरीही घरातील व्यक्तीद्वारे प्रसार झालेल्या विद्यार्थ्याच्या संपर्कात आलेल्या या शाळेतील पाच विद्यार्थी बाधित असल्याचे आढळून आले. यामध्ये नेरमधील दोन, तर पुसेगावमधील चार विद्यार्थी असल्याने शाळा त्वरित बंद केली.
संबंधित विद्यार्थ्यांना कोणताही त्रास होत नसून त्यांची तब्येत ठणठणीत आहे.
दरम्यान, शाळेतर्फे दररोज विद्यार्थ्यांचे टेंपरेचर, ऑक्सिजन लेव्हल, पल्सेस, सॅनिटायझेशन, मास्क व एका बाकावर एक विद्यार्थी या नियमांची अंमलबजावणी करण्यात येत होती. सर्व शिक्षकांचे कोरोना तपासणीचे आरटीपीसीआर अहवाल निगेटिव्ह आहेत. हे पाहूनच त्यांना शाळेत रूजू करण्यात आले आहे.
ताप, थंडी, सर्दी, खोकला यापैकी काहीही लक्षण आढळून आल्यास अशा विद्यार्थ्यांना पालकांनी शाळेत न पाठवता त्यांच्यावर त्वरित वैद्यकीय उपचार करावेत, असे आवाहन शाळा प्रशासनाने केले आहे. दरम्यान, शाळा व्यवस्थापन समितीच्या सोमवारी होणाऱ्या बैठकीत शाळा केव्हा सुरू करावयाची याबाबत निर्णय घेण्यात येणार आहे. -------