महाबळेश्वर : महाबळेश्वर पंचायत समितीच्यावतीने ‘माझे मूल, माझी जबाबदारी’ या उपक्रमाबाबत नागरिकांमध्ये जनजागृती व्हावी, कोरोनापासून लहान मुलांची काळजी कशी घ्यावी? तसेच म्युकरमायकोसिस व लसीकरण अशा कोरोना संदर्भातील विविध घटकांची माहिती देण्यासाठी ‘चित्ररथ कोरोनामुक्तीचा’ हा उपक्रम राबवण्यात आला. तसेच शिक्षकांनी माहितीपत्रक चित्ररथाद्वारे महाबळेश्वर तालुक्यातील सर्व गावागावांमध्ये जाऊन जनजागृती केली.
या उपक्रमाचे उद्घाटन ज्येष्ठ नेते बाळासाहेब भिलारे, पंचायत समितीचे सभापती संजय गायकवाड,जिल्हा पशुसंवर्धन अधिकारी, जिल्हा कृषी विकास अधिकारी, कृषी अधिकारी, गटविकास अधिकारी नारायण घोलप, गटशिक्षणाधिकारी आनंद पळसे, तालुका आरोग्य अधिकारी डॉ. अजित कदम यांच्या उपस्थितीत करण्यात आले. यावेळी पंचायत समिती कर्मचारी, शिक्षक संघटनांचे पदाधिकारी सुरेंद्र भिलारे, भाऊसाहेब दानवले चित्ररथातील सहभागी शिक्षक उपस्थित होते.
महाबळेश्वर तालुका कोरोनामुक्त करण्यासाठी सर्वतोपरी प्रयत्न करणार असल्याचे बाळासाहेब भिलारे यांनी सांगून, या अभिनव उपक्रमाचे कौतुक केले. सभापती संजय गायकवाड यांनी तालुका कोरोनामुक्त करण्यासाठी लसीकरणावर भर देणार असल्याचे सांगितले. सलग चार दिवस तालुक्यातील सर्वच गावागावांमध्ये जाऊन जनजागृती करण्यात येत होती. या उपक्रमात केंद्रप्रमुख प्रकाश भिलारे, संभाजी जाधव, शिवाजी निकम, संतोष शिंदे, विलास जाधव, अमित कारंडे, संतोष चोरगे, संजय सोंडकर, गणेश शेंडे, पुरुषोत्तम माने, संजय संकपाळ, अशोक राऊत, राजेंद्र गायकवाड आदी शिक्षकांनी यात उत्स्फूर्तपणे सहभाग घेतला. या चित्ररथाची सुरुवात मेटगुताड गावापासून करण्यात आली. तालुक्यातील सर्वच गावांमध्ये जाऊन याबाबतची जनजागृती करण्यात आली.
चौकट..
स्वागतासाठी शिक्षक, अंगणवाडी, आशाताई, आरोग्य सेविका...
प्रत्येक गावांमध्ये चित्ररथाचे उत्साहपूर्ण वातावरणात स्वागत करण्यात आले. चित्ररथाद्वारे पोवाडा, गाणी, पथनाट्य आदीच्या माध्यमातून वातावरणनिर्मिती करण्यात आली. त्यानंतर ‘माझे मूल, माझी जबाबदारी’ या उपक्रमांची तसेच कोरोनासंदर्भात घ्यावयाची खबरदारी, याबाबत प्रबोधन करण्यात आले. चित्ररथाच्या स्वागतासाठी गावागावामध्ये शिक्षक, अंगणवाडीताई, आशाताई, आरोग्य सेविका, ग्रामसेवक, ग्रामस्थ बहुसंख्येने उपस्थित होते.
१४महाबळेश्वर
महाबळेश्वर तालुक्यातील शिक्षकांनी माहितीपत्रक चित्ररथाद्वारे सर्व गावागावांमध्ये जाऊन जनजागृती केली. (छाया : जावेद खान)