लोकमत न्यूज नेटवर्क
सातारा : पुनवडी, (ता. सातारा) येथील शेतजमिनीत बेकायदा गौण खनिजाचे उत्खनन करत नुकसान झाले असून, याप्रकरणी संतोष अनिल भोसले व त्यांचे बंधू राजू अनिल भोसले यांच्यावर कायदेशीर कारवाई करावी, अशी मागणी जिल्हाधिकारी शेखरसिंह यांच्याकडे एका निवेदनाद्वारे केली असल्याची माहिती पुनवडी येथील शेतकरी सुधीर किसन देसाई यांनी पत्रकार परिषदेत दिली.
सुधीर देसाई म्हणाले, पुनवडी येथे वडिलोपार्जित शेतजमीन आहे. काही जमिनी आम्ही खुश खरेदीने खरेदी केलेल्या आहेत. त्यामध्ये आमची पूर्वीपासूनच प्रत्यक्ष कब्जे वहिवाट असलेल्या क्षेत्रात गुरे चारत आहोत. त्याधील गवत गुरांसाठी चारा म्हणून आणत आहे, परंतु गेल्या आठवड्यामध्ये गुरे चारण्यासाठी गेलो असता
आमच्या कब्जे वहिवाटीत असणाऱ्या क्षेत्रामध्ये बेकायदेशीर गौण खनिज उत्खनन सुरू असल्याचे निदर्शनास आले. दि. २८ डिसेंबर २०२० रोजी जिल्हाधिकारी शेखरसिंह यांच्याकडे तक्रारी अर्ज दाखल करण्यात आला होता. मात्र, त्यावर आजपर्यंत कोणतीही कारवाई करण्यात आलेली नाही. पुनवडी येथे स.न. ४६ मध्ये संतोष अनिल भोसले यांच्या नावे खाणपट्टा वा स्टोन क्रेशर आहे. तो मुळातच बेकायदेशीर असून त्याबाबत अनेकवेळा तक्रारी केलेल्या आहेत.
जिल्हाधिकाऱ्यांनी या प्रकरणात लक्ष घालून माझी व शासनाची फसवणूक केल्याप्रकरणी दोन्ही भोसले बंधूंवर कडक कारवाई करावी, अशी मागणी त्यांनी यावेळी केली. रात्रभर स्टोन क्रेशर चालवला जात असल्यामुळे ध्वनी व वायुप्रदूषण मोठ्या प्रमाणावर होत असते. त्याचे पुरावे चौकशीच्या वेळी सादर करण्यात येतील. स्फोटासाठी सुरुंग लावण्यासाठी परवानगी घेण्यात येत नाही. पावसाळ्यामध्ये सर्व्हे नंबर ४५ मध्ये असणाऱ्या जमिनीत बंधारा आहे. तो क्रशरच्या पावडरने पूर्णपणे भरून ते पाणी उरमोडी धरणात जात असल्यामुळे धरणाचे पाणी दूषित होत आहे. या प्रकरणाची सखोल चौकशी करण्यात यावी, अशीही मागणी त्यांनी यावेळी केली.
कोट: पुनवडीत खाणपट्टा आहे. त्याला जिल्हाधिकाऱ्यांची परवानगी घेतली आहे. याबाबत उच्च न्यायालयाने देखील निर्णय दिला आहे. अशा प्रकारचा आरोप करणे हा न्यायालयाचा अवमान ठरू शकतो. याप्रकरणी आम्ही त्यांच्यावर कायदेशीर कारवाई करणार आहोत.
-राजू भोसले