खरसुंडी : आटपाडी तालुक्यातील तीर्थक्षेत्र खरसुंडी येथे सिद्धनाथ देवाची पौष यात्रा आणि खरसुंडी, नेलकरंजी, माणेवाडी दर्यातील प्रसिध्द त्रिवार्षिक यात्रा कोरोनाच्या पार्श्वभूमीवर रद्द केली होती; परंतु लाखो भाविकांच्या श्रद्धेचा विचार करून लोकप्रतिनिधी, आमदार, खासदार यांच्या प्रयत्नाने प्रशासनाने पारंपरिक पद्धतीने मोजक्याच मानकरी, सेवेकरी भाविकांच्या उपस्थितीत उत्सव सोहळ्यास परवानगी दिली.
या पार्श्वभूमीवर पोलीस बंदोबस्तात खरसुंडी सिद्धनाथाची पालखी उत्सव मूर्तीसह खरसुंडी सिध्दनाथ मंदिरातून घोडेकुर, धावडवडी, औटेवाडी, नेलकरंजी माणेवाडी दर्यात दाखल झाली. पारंपरिक विधिवत पूजा अर्चा करून पुन्हा दुसऱ्या दिवशी दुपारी बारा वाजता त्याच मार्गाने खरसुंडी सिध्दनाथ मंदिरात परतली. दर्शनासाठी भाविकांनी गर्दी केली होती.
यावेळी पोलिसांना सोहळा सुरळीत पार पाडताना तारेवची कसरत करावी लागली. कोणताही अनुचित प्रकार न घडता हा पारंपरिक सोहळा पार पडल्याने देवस्थान समितीने समाधान व्यक्त केले. यावेळी माजी आमदार राजेंद्रअण्णा देशमुख, युवक काँग्रेसचे नेते जयदीप भोसले उपस्थित होते. देवस्थान समितीने योग्य नियोजन केले; तर आटपाडी पोलीस ठाण्याचे पोलीस निरीक्षक अरुण देेवकर, पोलीस सहाय्यक निरीक्षक सुधीर पाटील यांच्या मार्गदर्शनाखाली मोठा पोलीस बंदोबस्त तैनात होता.
फोटो-२८खरसुंडी३
फोटो ओळ : खरसुंडी (ता. आटपाडी) येथील सिद्धनाथाचा पालखी उत्सव पारंपरिक पद्धतीने पार पडला.