लोकमत न्यूज नेटवर्क
सांगली : लाकडाची वाहतूक करताना पकडलेला ट्रक सोडून देण्याच्या मोबदल्यात ३० हजाराच्या लाचेची मागणी करून ती डाटा ऑपरेटरकरवी स्वीकारल्याप्रकरणी तासगाव येथे महिला वनक्षेत्रपालावर कारवाई करण्यात आली. कौशल्या हणमंत भोसले (वय ३२, मूळ रा. चांदणी चौक, रहिमतपूर, जि. सातारा, सध्या तासगाव) असे महिला अधिकाऱ्याचे नाव असून, श्रीकांत तुकाराम शिंदे (४३, रा. मणेराजुरी ता. तासगाव) या डाटा ऑपरेटरला लाच स्वीकारताना पकडण्यात आले.
याबाबत माहिती अशी की, तक्रारदार त्याच्या मालकीच्या ट्रकमधून लाकडाची वाहतूक करत असताना, वनक्षेत्रपाल कौशल्या भोसले हिने कारवाई करत ट्रक तासगावातील वन परिक्षेत्र कार्यालयात आणून लावला होता. यानंतर ट्रक सोडून देण्यासाठी भोसले व ऑपरेटर शिंदे याने ३० हजार रुपयांची मागणी केली होती. यानंतर तक्रारदाराने लाचलुचपत प्रतिबंधक विभागाशी संपर्क साधून अर्ज केला. या विभागाने केलेल्या पडताळणीत वनक्षेत्रपाल भोसलेने ३० हजारांची मागणी करून ती रक्कम शिंदे याच्याकडे देण्यास सांगितल्याचे निष्पन्न झाले होते.
गुरुवारी लाचलुचपत प्रतिबंधक विभागाने तासगाव येथील वन परिक्षेत्र कार्यालयात सापळा लावला. यावेळी ऑपरेटर शिंदे याने लाचेची मागणी करून ती स्वीकारताना त्यास पकडण्यात आले, तर शिंदे याला लाच स्वीकारण्यास सांगितले म्हणून भोसले हिला कार्यालयातून ताब्यात घेण्यात आले. भोसले हिच्या सांगण्यावरूनच लाच स्वीकारण्यात आली होती. दोघांवरही लाचलुचपत प्रतिबंधक अधिनियमानुसार तासगाव पोलिसात गुन्हा दाखल करण्याची प्रक्रिया सुरू होती.
उपअधीक्षक सुजय घाटगे यांच्या मार्गदर्शनाखाली निरीक्षक गुरुदत्त मोरे, अविनाश सागर, धनंजय खाडे, संजय संकपाळ, सलीम मकानदार, अजित पाटील, राधिका माने, विना जाधव आदींच्या पथकाने ही कारवाई केली.
कोट
कोणत्याही शासकीय, निमशासकीय अधिकारी, कर्मचाऱ्याने काम करताना लाचेची मागणी करणे हा गुन्हा आहे. त्यामुळे कोणालाही अशी रकमेची मागणी झाल्यास नागरिकांनी लाचलुचपत प्रतिबंधक विभागाशी संपर्क साधावा.
सुजय घाटगे, उपअधीक्षक, लाचलुचपत.