बागणी (ता. वाळवा) येथे दक्षता कमिटीकडून कोरोना उपाययोजनांबाबत पोलीस निरीक्षक अमित सिद व अप्पर तहसीलदार दीक्षांत देशपांडे यांनी माहिती घेतली.
लोकमत न्यूज नेटवर्क
बागणी : बागणी प्राथमिक आरोग्य केंद्राच्याअंतर्गत येणाऱ्या नऊ गावांमध्ये तालुक्यात सर्वात जास्त कोरोनाचा फैलाव होत असल्याने तहसीलदारांनी नाराजी व्यक्त केली. कोरोना साखळी तोडण्यासाठी कडक सूचना देऊन त्याची त्वरित अंमलबजावणी करण्याचे आदेश आष्टा अप्पर तहसीलदार दीक्षांत देशपांडे यांनी बागणी ग्रामपंचायतीमध्ये कोरोना आढावा बैठकीच्यावेळी उपस्थित सरपंच, उपसरपंच, दक्षता कमिटी सदस्यांना दिले.
तहसीलदार देशपांडे यांनी गावातील सध्या असलेल्या कोराना रुग्णांची संख्या व त्याच्या उपाययोजनांची माहिती आरोग्य सेविका व दक्षता कमिटीकडून घेतली. यावेळी त्यांनी बागणीसह काकाचीवाडी, रोझावाडी गावांना भेटी दिल्या.
यावेळी आष्टा पोलीस निरीक्षक अमित सिद, बागणीचे सरपंच संतोष घनवट, उपसरपंच विष्णू किरतसिंग, तंटामुक्तीचे अध्यक्ष डी. आर.पाटील, सर्कल प्रफुल माळवदे, तलाठी सुरेश कगुडे, आरोग्य सेविका सुजाता पाटील, आशा सेविका इनताज सुतार, सहायक पोलीस संजय सनदी, ग्रामपंचायत सदस्य सागर गायकवाड, सतीश काईत, सुधीर पाटील, रणजित भोई, सुरेंद्र वंजाळे व सिकंदर कराडकर उपस्थित होते.
चौकट
गावातील पै-पाहुणे जपण्यासाठी रक्षाविसर्जन व जियारत कार्यक्रमाला होणारी प्रचंड गर्दी, तसेच कडक निर्बंध लावल्यावर पानपट्टी उघडता येत नसल्याने पानपट्टीसमोर मोटरसायकलच्या डिकीत मावा ठेवून विक्री करणारे पानपट्टी चालक व गल्ली-बोळात फिरणारे भाजीपाला विक्रेते हे कोरोना पसरण्यास मुख्य कारणीभूत आहेत. जर कोराना रोखायचा असेल तर दक्षता कमिटींनी यांना रोखले पाहिजे.