कडेगाव : कोरोना प्रतिबंधात्मक उपाययोजना म्हणून राज्य शासनाने कठोर निर्बंध घातले आहेत. कडेगाव शहर व तालुक्यातही सकाळी सातपासून रात्री आठपर्यंत अत्यावश्यक सेवा व प्रशासकीय सूचनांप्रमाणे परवानगी असलेली दुकाने उघडी असतात व अन्य सर्व दुकाने बंद असतात. येथे मिनी लॉकडाऊनला नागरिकांकडून सकारात्मक प्रतिसाद मिळत आहे. मात्र जी दुकाने बंद आहेत, त्या व्यावसायिकांमधून नाराजीचा सूर उमटत आहे.
तालुक्यात सायंकाळी आठनंतर शुकशुकाट असतो. बाजारपेठेतही एकाच ठिकाणी पाचपेक्षा जास्त लोक दिसत नाहीत. कडेगावचे पोलीस निरीक्षक पांडुरंग भोपळे व चिंचणीचे सहायक पोलीस निरीक्षक संतोष गोसावी यांच्या आवाहनास प्रतिसाद देत तालुक्यातील व्यावसायिकांनी दुकाने बंद करण्यास सहकार्य केले आहे. रात्री आठनंतर शहरात ठिकठिकाणी उभे राहून पोलीस रस्त्यावरील लोकांना बाहेर निघण्याचे कारण विचारत आहेत. शहर व तालुक्यात मोठ्या प्रमाणात पोलीस तैनात करण्यात आले आहेत.
चौकट
पाडव्यापर्यंत दुकानांना परवानगी द्या
मंगळवारी गुढीपाडवा आहे. या मुहूर्तावर नवीन कपडे, गाड्या किंवा नवीन वस्तू खरेदी होते. मागील वर्षीच्या गुढीपाडव्यालाच लॉकडाऊन होता. सततच्या लॉकडाऊनमुळे व्यापारी, व्यावसायिकांना आर्थिक संकटाचा सामना करावा लागत आहे. शासनाने घालून दिलेले नियम आणि सूचनांचे पालन करू, परंतु गुढीपाडव्यापर्यंत दुकाने उघडी ठेवण्यास परवानगी द्या, अशी मागणी व्यापारी करत आहेत.