फोटो -विटा नगरपालिकेचा फोटो वापरणे.
दिलीप मोहिते
लोकमत न्यूज नेटवर्क
विटा : लॉकडाऊनमुळे अर्थचक्र थांबलेल्या विटा नगरपालिकेने आता मार्चअखेरमुळेे मालमत्ता कर वसुली जोमात सुरू केली आहे. गेल्या काही वर्षांपासून थकीत असलेल्या व चालू वर्षाच्या करवसुलीसाठी पालिका प्रशासनाने आता कडक धोरणाचा वापर करण्याचा निर्णय घेतला आहे. त्यामुळे दि. ३१ मार्चपूर्वी कराची थकीत रक्कम न भरल्यास संबंधित मालमत्ताधारकांची नावे शहरातील चौकाचौकांत डिजिटल फलकावर झळकणार आहेत.
गेल्या वर्षभरापासून सततच्या लॉकडाऊनमुळे अनेक मालमत्ताधारक कराची रक्कम भरू शकले नाहीत. परिणामी, पालिकेचे वर्षभराचे अर्थचक्रच थांबले होते. मात्र, आता पालिका प्रशासनाने कराची थकीत रक्कम भरून घेण्यासाठी ताकद लावली आहे.
विटा नगरपालिकेकडे पाणीपट्टी, घरपट्टी, जाहिरात, अग्निशमन यासह अन्य कर रूपाने जमा होणाऱ्या रकमेपैकी जवळपास ७० टक्के खर्च पिण्याच्या पाणी योजनांवर होत आहे. त्यामुळे उर्वरित रकमेत नागरिकांना अन्य सुविधा देण्यासाठी पालिकेला चांगलीच कसरत करावी लागत आहे. त्यातच गेल्या काही वर्षांपासून कराची रक्कम न भरलेले अनेक मालमत्ताधारक आहेत. त्यात काही बड्या मालमत्ताधारकांचा समावेश आहे.
त्यामुळे यावर्षी थकीत कर जमा करण्यासाठी अंतिम टोकाचा निर्णय घेतला जाणार आहे. कराची थकीत रक्कम न भरल्यास नळकनेक्शन तोडण्यासह जप्तीची कारवाईही होणार आहे. त्यापूर्वी थकबाकीदारांची नावे डिजिटल फलकाद्वारे शहरातील प्रत्येक चौकात झळकविण्यात येणार आहेत.
चौकट :
थकबाकी तातडीने भरा
विट्यात कर थकबाकीदारांची यादी मोठी आहे. काहीजणांवर कारवाईही केली; परंतु उर्वरित थकबाकीदार अजूनही बिनधास्त आहेत. त्यामुळे कर वसुलीची मोहीम गतिमान केली आहे. जे कोणी मालमत्ताधारक पालिकेचा कर वेळेत भरणार नाहीत, त्यांची नावे चौकाचौकांत डिजिटल फलकावर लावण्यात येणार आहेत. त्यामुळे थकबाकी तातडीने पालिका प्रशासनाकडे जमा करावी, असे आवाहन मुख्याधिकारी अतुल पाटील यांनी केले आहे.