लोकमत न्यूज नेटवर्क
कवठे एकंद : तासगाव-सांगली रस्त्याकडेला आगीच्या झळीने झाडांचे मोठे नुकसान झाले आहे.
कवठेएकंद परिसरात गेल्या दोन महिन्यात चार वेळा झाडांना आग लागण्याचे प्रकार घडले आहेत. या प्रकरणाकडे प्रशासनाचे दुर्लक्ष आहे.
कवठेएकंद परिसरात तासगाव-सांगली रस्त्याच्या दुतर्फा वडासह अन्य झाडे आहेत. मात्र सार्वजनिक बांधकाम विभागाच्या देखभालीअभावी नैसर्गिक साधन संपत्तीचे नुकसान होत आहे.
गेल्या आठवड्यात शेतकऱ्यांनी बांधावरील गवत पेटवले. त्यावेळी दहा ते पंधरा झाडांना या आगीची झळ बसली. रात्रीच्या वेळी अज्ञाताने ही आग लावली होती. याशिवाय कवठेएकंद पाणी योजना कार्यालयासमोरील कचरा पेटवून दिल्याने चार-पाच झाडांना झळ बसली होती.
तासगाव-सांगली मार्गावर असे प्रकार वारंवार घडत आहेत. नागाव रस्त्यावर वडाच्या झाडालाही आग लागल्याची घटना गेल्या महिन्यात घडली होती. अशा घटनेकडे सार्वजनिक बांधकाम विभागाचे तसेच स्थानिक प्रशासनाचे पूर्णपणे दुर्लक्ष आहे. यामुळे झाडांना आग लागण्याचे प्रकार वारंवार घडत आहेत.
काही ठिकाणी जाणीवपूर्वक असे प्रकार घडवून आणले जात आहेत. त्यामुळे आगी लागण्याच्या प्रकाराकडे गांभीर्याने लक्ष देण्याची गरज आहे.
आगीची घटना घडल्यानंतर किंवा बातमी आल्यानंतर बऱ्याच वेळा वृक्षसंवर्धनाबाबतची चर्चा फक्त सोशल मीडियापुरतीच मर्यादित दिसून येते.
बऱ्याचवेळा टेलिफोन लाईनची खुदाई, पाईपलाईन खुदाई, रस्ता दुरुस्ती अशी कामे करताना झाडांच्या सुरक्षेबाबत काळजी केली जात नाही.
फोटो ओळ : कवठेएकंद (ता. तासगाव) येथे तासगाव-सांगली मार्गालगत गवत पेटविल्याने आगीची झळ बसून झाडांचे नुकसान झाले.