रिळेच्या उपसरपंचाविराेधात जातिवाचक शिवीगाळीचा गुन्हा
By लोकमत न्यूज नेटवर्क | Published: September 25, 2021 04:28 AM2021-09-25T04:28:30+5:302021-09-25T04:28:30+5:30
शिराळा : रिळे (ता. शिराळा) येथील उपसरपंच बाजीराव पांडुरंग सकपाळ यांच्याविरुद्ध जातिवाचक शिवीगाळ केल्याबद्दल तसेच संजय ज्ञानदेव आढाव, योगेश ...
शिराळा : रिळे (ता. शिराळा) येथील उपसरपंच बाजीराव पांडुरंग सकपाळ यांच्याविरुद्ध जातिवाचक शिवीगाळ केल्याबद्दल तसेच संजय ज्ञानदेव आढाव, योगेश संजय आढाव, दीपाली संजय आढाव या तिघांविरुद्ध मारहाण करून सोन्याची चेन, मोबाईल व रोख रक्कम असा ४७ हजार ५०० रुपयांचा ऐवज चोरल्याचा गुन्हा शिराळा पोलीस ठाण्यात दाखल करण्यात आला आहे. ही घटना दि. १६ सप्टेंबरला दुपारी १ वाजता घडली. मात्र, फिर्यादी उपचारासाठी दाखल असल्याने शुक्रवारी याप्रकरणी गुन्हा दाखल करण्यात आला आहे.
याबाबत पोलीस ठाण्यातून मिळालेली माहिती अशी की, फिर्यादी प्रताप राजाराम काळे यांनी घरकुल योजनेच्या गैरव्यवहारबाबत लेखी तक्रार दिली होती. या चौकशीसाठी त्यांना ग्रामपंचायत कार्यालयात बोलाविले होते. चौकशी पूर्ण झाल्यानंतर कार्यालयातून बाहेर पडल्यानंतर संजय आढाव, योगेश आढाव, दीपाली आढाव यांनी लाथा-बुक्क्यांनी, लाकडी दांडक्याने मारहाण करून त्यांना गंभीर जखमी केले, तसेच गळ्यातील एक तोळ्याची चेन, रोख ५ हजार ५०० रुपये, मोबाईल असा ४७ हजार ५०० रुपयांचा मुद्देमाल चोरला. यादरम्यान उपसरपंच बाजीराव सपकाळ यांनी जातिवाचक शिवीगाळ केली.
याप्रकरणी उपसरपंच बाजीराव सपकाळ यांच्याविरुद्ध जातिवाचक शिवीगाळ केल्याबद्दल तर इतर तिघांविरुद्ध मारहाण करून ऐवज चोरल्याचा गुन्हा दाखल करण्यात आला आहे. पुढील तपास उपविभागीय पोलीस अधीक्षक कृष्णात पिंगळे करत आहेत.