लोकमत न्यूज नेटवर्क
शिराळा
: शिराळा तालुक्यातील डोंगरी भागातील रानमेवा फुलला आहे. उन्हाळी हंगामतील येथील आल्हाददायक वातावरण, सदाहरित निसर्ग, रानमाळावर फुलणारा करवंदे, जांभूळ, डोंबले हा रानमेवा नेहमीच पर्यटक आणि स्थानिकांचे आकर्षणाचे केंद्रबिंदू असतो. परंतु सध्या कोरोनामुळे या पर्वणी पासून वंचित राहावे लागत असल्याचे चित्र पहायला मिळत आहे.
उन्हाळ्यात चांदोली अभयारण्य परिसर, खुंदलापूर, उत्तर भागातील डोंगरी भागात, मेणी खोरे आणि गुढे पाचगणी या विभागात मुबलक प्रमाणात मिळणारे करवंद, जांभूळ, आदी रानमेवा म्हणजेच स्थानिक आणि पर्यटकांसाठी जणू मेजवानीच असते.
हा डोंगरी भाग असल्याने येथील जंगलात मोठ्या प्रमाणात मिळणारा हा रानमेवा आरोग्याच्या दृष्टीने फायदेशीर आहे.
येथे आंबट, गोड करवंद, आणि जांभूळ हा रानमेवा उन्हाळ्यात उपलब्ध असतो.
मार्च ते जून या महिन्यामध्ये मिळणारा हा रानमेवा म्हणजेच पर्यटकांच्या आवडीचे फळे. काही पर्यटक तर खास डोंगर, जंगलात भटकंती करत याचा आस्वाद घेत असतात. जंगलात किंवा रस्त्याच्या कडेला असणारे तोरणे ही फळे दिसताच येणाऱ्या जाणाऱ्यांना याचा मोह आवरता येत नाही. मात्र लॉकडाऊनमुळे याचा आस्वाद घेता येणार नाही.
चाैकट
उत्पन्न थांबले
खुंदलापूर भागातील धनगर समाजातील महिला व पुरुष उदरनिर्वाहासाठी हा रानमेवा विकण्यासाठी शिराळा, इस्लामपूर, सांगली आदी भागात जातात पण सध्याचे कोरोनाचे वातावरण पाहता सर्वत्र टाळेबंदी असल्याने या रानमेव्यांचा आस्वाद घेणे कठीणच होऊन बसले आहे. तसेच धनगर समाजातील या नागरिकांच्यावर उपासमारीची वेळ आली आहे.