चिपळूण : येथील वन विभाग, रत्नागिरी आणि मानद वन्यजीव रक्षक नीलेश बापट यांचे संयुक्त विद्यमाने देवरुख येथे परसदारी फुलपाखरु उद्यान ही संकल्पना अभ्यासक प्रतीक मोरे यांनी यशस्वी केली आहे. त्यांचे ५ जुलै रोजी सायंकाळी ५ वाजता ‘रत्नागिरी जिल्ह्यातील फुलपाखरांची जैवविविधता, संवर्धन आणि उद्यान निर्मिती’ या विषयावर वेबिनार आयोजित करण्यात आले आहे.
आशा सेविकांना यंत्राचे वाटप
खेड : खेड तालुका राष्ट्रवादी काँग्रेसतर्फे लोटे घाणेखुंट परिसरातील आशा सेविकांना व गरजू ग्रामस्थांना कोरोना संसर्गापासून बचाव करण्यासाठी वाफेच्या यंत्राचे वाटप करण्यात आले. या उपक्रमासाठी लागणारी ६८ वाफेची यंत्रे लोटे औद्यागिक वसाहतीत कार्यरत असलेल्या कृष्णा ॲन्टीऑक्सिडंट युनिट दोन या कारखान्याकडून सामाजिक बांधिलकी स्वरुपात देण्यात आली.
रस्त्यावर खड्ड्यांचे साम्राज्य
देवरुख : संगमेश्वर तालुक्यातील माखजन - करजुवे रस्त्यावरील खड्ड्यांचे साम्राज्य पुन्हा वाढल्याने पादचाऱ्यांसह वाहनचालकांना जीव मुठीत धरुन प्रवास करावा लागत आहे. या महत्त्वाच्या रस्त्याची तत्काळ दुरुस्ती न केल्यास खड्ड्यांमध्ये वृक्षारोपण करु, असा इशारा मावळंगेचे शिवसेना शाखाप्रमुख बाबू मोरे यांनी दिला आहे.
अनधिकृत वाळू उत्खनन
देवरुख : महसूल यंत्रणेच्या आशिर्वादाने जुलै महिन्याच्या पहिल्या आठवड्यात संगमेश्वर तालुक्याच्या पेढांबे गावात सक्शन पंपाद्वारे अवैध वाळू उत्खनन सुरु आहे. आंगवली पंचक्रोशीतही अशाचप्रकारे उत्खनन सुरु असून, महसूल अधिकाऱ्यांनी फक्त बघ्याची भूमिका घेतली आहे.
नारळ रोपांचे वाटप
चिपळूण : तालुक्यातील कळंबस्ते निर्मल ग्रामपंचायत येथे कृषी दिनाचे औचित्य साधून ग्रामपंचायतीच्या परिसरामध्ये नारळ रोपांची लागवड करण्यात आली. तसेच फणस कलम रोपांचे शेतकरी कुटुंबांना प्रत्येकी एक रोप वाटण्याचा शुभारंभ करण्यात आला.
चारसुत्री भातलावणी प्रात्यक्षिक
देवरुख : संगमेश्वर तालुक्यातील मौजे आंत्रवली गावात तालुका कृषी संजीवनी मोहिमेंतर्गत चारसुत्री पध्दतीने भात लावणी प्रात्यक्षिक दाखविण्यात आले. शेतीशाळा वर्ग शेतकरी आत्माराम माईन यांच्या शेतात घेण्यात आला. यावेळी मंडल कृषी अधिकारी सुरडकर यांनी मार्गदर्शन केले.