Ratnagiri: जादा परताव्याचे आमिष दाखवत वृद्धाला १८ लाखांचा गंडा, गुन्हा दाखल

एका बनावट ऑनलाइन ट्रेडिंग साईटवर खाते उघडण्यास सांगून डॉलरमध्ये गुंतवणूक करण्यास भाग पाडले

दापोली (जि. रत्नागिरी) : शेअर मार्केटमध्ये जादा परतावा मिळवून देण्याचे आमिष दाखवत ७२ वर्षीय सेवानिवृत्त वृद्धाची तब्बल १८ लाख ३७ हजार रुपयांची ऑनलाइन फसवणूक झाल्याची घटना दापोली तालुक्यात उघडकीस आली आहे. याप्रकरणी दापोली पोलिस स्थानकात गुन्हा दाखल करण्यात आला आहे.

पोलिसांनी दिलेल्या माहितीनुसार, दापोली तालुक्यातील गव्हे येथील एका वृद्धाशी १० डिसेंबर २०२५ ते २७ फेब्रुवारी २०२६ या कालावधीत मयंक सिंग या संशयिताने ई-मेल व टेलिग्रामच्या माध्यमातून संपर्क साधला. शेअर मार्केटचे प्रशिक्षण देऊन मोठा आर्थिक फायदा मिळवून देण्याचे आश्वासन देत त्याने विश्वास संपादन केला. त्यानंतर एका बनावट ऑनलाइन ट्रेडिंग साईटवर खाते उघडण्यास सांगून डॉलरमध्ये गुंतवणूक करण्यास भाग पाडले.

प्रारंभी काही व्यवहारांमध्ये नफा दाखवून त्या वृद्ध व्यक्तीचा विश्वास वाढवण्यात आला. त्यानंतर अधिक नफा मिळवून देण्याच्या नावाखाली वेळोवेळी मोठ्या रकमा ऑनलाइन जमा करण्यास सांगण्यात आले. विविध टप्प्यांमध्ये एकूण १८ लाख ३७ हजार रुपये उकळण्यात आले. मात्र, प्रत्यक्षात कोणताही परतावा मिळाला नाही. आपली फसवणूक झाल्याचे लक्षात येताच या वृद्धाने पोलिसांकडे धाव घेतली. अधिक तपास दापोली पोलिस करीत आहेत.

याप्रकरणी दापोली पोलिसांनी संशयित मयंक सिंग याच्याविरोधात भारतीय न्याय संहिता (बीएनएस) कलम ३१८ (२) तसेच माहिती तंत्रज्ञान अधिनियम कलम ६६ (डी) अन्वये गुन्हा दाखल केला आहे.