रत्नागिरी : शालेय पोषण आहाराची रक्कम मिळण्यासाठी विद्यार्थ्यांना बँक खाते उघडण्यास सांगण्यात आले आहे. या निर्णयातील त्रुटीबाबत महाराष्ट्र नवनिर्माण सेनेतर्फे प्राथमिक व माध्यमिक शिक्षणाधिकारी निशादेवी वाघमोडे यांना निवेदन देण्यात आले. यात बँक खाते उघडण्यासाठी मुलांना बँकेत न पाठविता त्यांच्या पालकांच्या खात्यावर ही रक्कम जमा करावी, अशी मागणी उपजिल्हा अध्यक्ष रूपेश सावंत यांनी या निवेदनात केली आहे.
या निवेदनात असे नमूद करण्यात आले आहे की, शासन निर्णयानुसार सर्व शालेय विद्यार्थ्यांना शाळांमार्फत प्रशासनाकडून पोषण आहार दिला जातो. त्या अंतर्गत २०२१ च्या उन्हाळी सुट्टीसाठी केवळ एक वेळ विशेष कल्याणकारी उपाय म्हणून पात्र विद्यार्थ्यांना पोषण आहारइतकीच रक्कम देण्याचा निर्णय घेण्यात आला आहे; परंतु केवळ नी केवळ आधारकार्ड लिंक असलेल्या विद्यार्थ्यांच्याच बँक खात्यामध्ये रक्कम जमा करण्याचा निर्णय झाला असल्याचे कळते. वास्तविक बहुतांश विद्यार्थ्यांचे बँकखाते अस्तित्वात नाहीत. अशा विद्यार्थ्यांना या कोरोना महामारीच्या काळात बँक खाते उघडण्याचा बालहट्ट आपणाकडून करण्यात आला आहे. याचे नेमके प्रयोजन काय? असा प्रश्न करण्यात आला आहे.
या कोरोना महामारीच्या काळात विशेषतः तिसऱ्या लाटेचा लहान मुलांना धोका आहे, असा शासनाचाच अहवाल आहे. असे असताना या विद्यार्थ्यांना बँक खाते उघडण्यासाठी बँकेच्या दारात रांगेमध्ये उभे करणे कितपत योग्य आहे, अशी विचारणाही या निवेदनात करण्यात आली आहे. बँकेत खाते उघडण्यासाठी गेल्यानंतर रांगेत उभे राहताना मुलांना संसर्गाचा धोका अधिक आहे. त्याऐवजी विद्यार्थ्यांच्या पालकांच्या बँक खात्यामध्ये रक्कम जमा करावी, अशी मागणीही महाराष्ट्र नवनिर्माण सेनेतर्फे उपजिल्हा अध्यक्ष रूपेश सावंत यांनी या निवेदनात केली आहे.
हे निवेदन शिक्षणाधिकारी निशादेवी वाघमोडे यांना देताना मनसेचे उपजिल्हाध्यक्ष रुपेश सावंत, मनसे कामगार सेना जिल्हा चिटणीस छोटू खामकर, शहराध्यक्ष सतीश राणे, उपशहर अध्यक्ष मयुरेश मडके, सिद्धेश धुळप, बिपीन शिंदे, सुरक्षारक्षक जिल्हाध्यक्ष अरविंद मालाडकर व पदाधिकारी उपस्थित होते.
फोटो मजकूर
पोषण आहार रकमेबाबत शिक्षणाधिकारी निशादेवी वाघमोडे यांना निवेदन देताना मनसे उपजिल्हाध्यक्ष रुपेश सावंत, मनसे कामगार सेना जिल्हा चिटणीस छोटू खामकर, शहराध्यक्ष सतीश राणे, उपशहर अध्यक्ष मयूरेश मडके, सिद्धेश धुळप, बिपीन शिंदे, सुरक्षारक्षक जिल्हाध्यक्ष अरविंद मालाडकर व पदाधिकारी उपस्थित होते.