रत्नागिरी : काेराेनामुळे मृत्यू झालेल्या रत्नागिरी जिल्हा मध्यवर्ती सहकारी बँकेतील कर्मचाऱ्यांच्या वारसांना ५ लाखांची आर्थिक मदत देण्यात आली. लांजा आणि संगमेश्वर येथील दाेन कर्मचाऱ्यांचा काेराेनामुळे मृत्यू झाला असून, त्यांच्या वारसांना ही मदत देण्यात आली.
बँकिंग सेवा ही अत्यावश्यक सेवा असल्यामुळे कोविड-१९चे संक्रमण काळात सुरुवातीपासून लॉकडाऊनमध्येही बँकेचे अधिकारी व कर्मचारी बँकेच्या ग्राहकांना अखंडपणे अविरत सेवा पुरवित आहेत. बँकेचे कर्मचारी व प्राथमिक शेती संस्थांचे सचिव सातत्याने बँकेच्या कर्ज वसुलीसाठी प्रयत्न करीत आहेत. या सर्व बाबींचा विचार करून कोविड-१९च्या प्रादुर्भावाने बँक कर्मचारी व शेती संस्थांचे सचिव यांचे निधन झाल्यास त्यांच्या वारसांना आर्थिक मदत देण्याचा निर्णय बँकेचे अध्यक्ष डॉ. तानाजीराव चोरगे यांच्या अध्यक्षतेखाली झालेल्या संचालक मंडळाच्या सभेमध्ये घेण्यात आला हाेता.
या निर्णयानुसार लांजा शाखेतील बँकेचे कर्मचारी प्रवीण प्रभाकर कदम व संगमेश्वर शाखेतील अशोक गणपत चव्हाण यांच्या वारसांना प्रत्येकी पाच लाखांचे धनादेश अध्यक्ष डॉ. तानाजीराव चोरगे यांच्या हस्ते देण्यात आले. यावेळी बँकेचे उपाध्यक्ष बाबाजीराव जाधव, संचालक रमेश दळवी, सुधीर कालेकर, डॉ. अनिल जोशी, राजेंद्र सुर्वे, आदेश आंबोळकर, महादेव सप्रे, गणेश लाखण, आमदार शेखर निकम, ॲड. दीपक पटवर्धन, दिनकर मोहिते, मधुकर टिळेकर, जयवंत जालगावकर, चंद्रकांत बाईत, अमजद बोरकर, नेहा माने, माधुरी गोखले, तज्ज्ञ संचालक विवेक के. रेळेकर व ॲड. पूजा प्रियेश तलाठी, कर्मचारी प्रतिनिधी जितेंद्र साळवी, दिलीप लाड व बँकेचे कार्यकारी संचालक सुनील गुरव, सरव्यवस्थापक अजय चव्हाण व सुधीर गिम्हवणेकर व अन्य अधिकारी उपस्थित होते. यावेळी कृषी शिक्षणाचे धाेरण निश्चित करण्यासाठी तयार करण्यात आलेल्या समितीत आमदार शेखर निकम यांचा समावेश करण्यात आल्याने सत्कार करण्यात आला.
----------------------------
कृषी शिक्षणाचे धाेरण निश्चित करण्यासाठी तयार करण्यात आलेल्या समितीत आमदार शेखर निकम यांचा समावेश करण्यात आल्याने जिल्हा बँकेचे अध्यक्ष डाॅ. तानाजीराव चाेरगे यांच्या हस्ते सत्कार करण्यात आला. यावेळी बँकेचे संचालक उपस्थित हाेते.