पुणे : पाण्याच्या टँकरच्या धडकेत दुचाकीवरील सहप्रवासी महिला मृत्युमुखी पडल्याची घटना पुणे-सातारा रस्त्यावरील चव्हाण नगर परिसरात घडली. अपघातात दुचाकीस्वार पती आणि मुलगा जखमी झाला. याप्रकरणी टँकर चालकाविरोधात सहकारनगर पोलिसांनी गुन्हा दाखल केला.
रुमी अजित पाल (३१, रा. संतोषनगर, कात्रज) असे मृत्युमुखी पडलेल्या महिलेचे नाव आहे. अपघातात दुचाकीस्वार पती अजित (३५) आणि मुलगा जखमी झाला. त्यांच्यावर रुग्णालयात उपचार सुरू असल्याची माहिती पोलिसांनी दिली. याप्रकरणी टँकर चालकाविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, दुचाकीस्वार अजित पाल, त्यांची पत्नी रुमी आणि मुलगा हे पुणे-सातारा रस्त्यावरून ७ जून रोजी रात्री सव्वा अकराच्या सुमारास निघाले होते. धनकवडीतील चव्हाणनगर परिसरातील कमानीजवळ भरधाव पाण्याच्या टँकरने दुचाकीला धडक दिली. अपघातात पाल कुटुंबीय गंभीर जखमी झाले. अपघातानंतर नागरिक, तसेच पोलिसांनी तिघांनी खासगी रुग्णालयात दाखल केले. उपचारापूर्वीच रुमी यांचा मृत्यू झाला होता. पोलिस उपनिरीक्षक रेश्मा साळुंखे पुढील तपास करीत आहेत.
शहर परिसरात गंभीर अपघातांच्या घटनांमध्ये वाढ झाली आहे. पंधरा दिवसात शहरातील वेगवेगळ्या भागात झालेल्या अपघातात १० जणांचा मृत्यू झाला. यात तीन अल्पवयीनांचा समावेश आहे. डंपरच्या धडकेत दुचाकीस्वार महाविद्यालयीन तरुणी एकता भरत पटेल (२३, रा. विद्यानगर, पिंपळे गुरव) हिचा मृत्यू झाल्याची घटना नुकतीच घडली होती. येरवडा भागातील शास्त्रीनगर भागात डंपरच्या धडकेत दुचाकीस्वार तरुणाचा मृत्यू झाल्याची घटना नुकतीच घडली होती. डंपर, टँकर, ट्रक अशा अवजड वाहनांमुळे गंभीर अपघात झाले आहेत. बहुतांश अपघात अवजड वाहनचालकांच्या बेदरकारपणामुळे झाले आहेत. अवजड वाहनचालकांविरोधात कडक कारवाई करण्याची मागणी करण्यात येत आहे.