बार कौन्सिलतर्फे वकिलांची पडताळणी

तोतया वकिलांना व बनावटगिरी करणाऱ्यांना आळा बसावा, या हेतूने राज्यात १५ सप्टेंबरपर्यंत सक्तीने वकिलांची पडताळणी करण्यात येणार आहे. यासंदर्भात बार कौन्सिल

पुणे : तोतया वकिलांना व बनावटगिरी करणाऱ्यांना आळा बसावा, या हेतूने राज्यात १५ सप्टेंबरपर्यंत सक्तीने वकिलांची पडताळणी करण्यात येणार आहे. यासंदर्भात बार कौन्सिल आॅफ इंडियाचे निर्देश दिले आहेत त्यानुसार ही तपासणी होणार असून, या तपासणीमध्ये प्रॅक्टिस करणारे आणि प्रॅक्टिस न करणाऱ्यांची वेगळी पडताळणी करण्यात येणार असल्याची माहिती बार कौन्सिल आॅफ महाराष्ट्र आणि गोवाचे अध्यक्ष अ‍ॅड. हर्षद निंबाळकर यांनी दिली. गेल्या काही वर्षांत न्यायालयात वकिलीची कोणतीही पदवी व सनद नसणारे तोतया वकिली करताना आढळले आहेत. शिवाजीनगर न्यायालयात आतापर्यंत १७ बनावट वकील पकडण्यात आले आहेत. काही दिवसांपूर्वी सर्वोच्च न्यायालयात तोतया वकिलाला पकडण्यात आले होते. या पार्श्वभूमीवर संपूर्ण देशभर वकिलांची पडताळणी करण्याचा निर्णय बार कौन्सिल आॅफ इंडियाने घेतला आहे. राज्यातील वकिलांची पडताळणी करण्याची जबाबदारी त्या, त्या राज्यातील बार कौन्सिलवर सोपविण्यात आली आहे. त्यानुसार महाराष्ट्र आणि गोवा येथील वकिलांची पडताळणी करण्याची जबाबदारी बार कौन्सिल आॅफ महाराष्ट्र आणि गोवावर आहे.बार कौन्सिलने राज्यातील जिल्हा, तालुका बार असोसिएशनवर त्या भागातील वकिलांची पडताळणी करण्याची जबाबदारी सोपविली आहे. त्यासंबंधीची नियमावली आणि फॉर्म पाठविण्यात आले आहेत. त्यात प्रॅक्टिस करणाऱ्या वकिलांचा पत्ता, नाव आणि मोबाईल नंबर असणार आहे. फॉर्म असणारे, जमीन व्यवहारात, विविध कार्यालयात काम करणाऱ्या वकिलांचीही नोंदणी करण्यात येणार आहे. नोकरी करणाऱ्या वकिलाची मात्र प्रॅक्टिस न करणाऱ्या वकिलांमध्ये नोंदणी करण्यात येणार आहे. वकिलांची नोंदणी केलेले प्रमाणपत्र जिल्हा, तालुका बारच्या वतीने बार कौन्सिलला देण्यात येतील. त्या प्रमाणपत्रानुसार वकिलांची यादी तयार करण्यात येणार आहे. ही यादी प्रथमवर्ग न्यायदंडाधिकाऱ्यांपासून, उच्च न्यायालयातील वकिलांना देण्यात येणार आहे. न्यायाधीश त्यामधील क्रमांक पाहून वकील आहे का, प्रॅक्टिस करतो का, हेदेखील कळणार आहे. कायद्याची माहिती सहजतेने उपलब्ध व्हावी, यासाठी बार कौन्सिल आॅफ महाराष्ट्र आणि गोवातर्फे न्यायालयांना १ लाख पुस्तके देण्यात येणार आहेत. (प्रतिनिधी)