इंदापूर : ठाणे महापालिकेच्या सहायक आयुक्त कल्पिता पिंपळे यांच्यावर केलेल्या भ्याड हल्ल्याच्या निषेधार्थ इंदापूर नगरपरिषदेच्या कर्मचाऱ्यांनी मंगळवारी सकाळी नगरपरिषदेसमोर हल्लेखोरांचा जाहीर निषेध करून एक दिवसीय काम बंद आंदोलन केले.
एकदिवसीय काम बंदमध्ये प्रशासकीय अधिकारी वर्षा क्षीरसागर, सभा अधीक्षक गजानन पुंडे, इंदापूर परिषद कर्मचारी संघटनेचे अध्यक्ष मोहन शिंदे, कर निरीक्षक श्रद्धा वळवडे, पाणीपुरवठा पर्यवेक्षक सुरेश सोनवणे, नोडल ऑफिसर सुजय मखरे, सहायक आरोग्य निरीक्षक लिलाचंद पोळ, भागवत मखरे, सुनील लोहिरे, उद्यान निरीक्षक अशोक चिंचकर, अल्ताफ पठाण यांसह पालिकेचे अधिकारी, कर्मचारी उपस्थित होते.
यावेळी बोलताना इंदापूर नगरपरिषदेच्या प्रशासकीय अधिकारी वर्षा क्षीरसागर म्हणाल्या, ठाणे महानगरपालिकेच्या सहायक आयुक्त कल्पिता पिंपळे या आपले कर्तव्य बजावत असताना, एका माथेफिरूकडून त्यांच्यावर हल्ला झाला व यात त्यांची हाताची बोटे तुटली गेली. तसेच डोक्यास देखील मोठी जखम झाली. आपले कर्तव्य प्रामाणिकपणे बजावणाऱ्या एका महिला अधिकाऱ्यावर झालेला हा भ्याड हल्ला अत्यंत संतापजनक आहे, याचा आम्ही जाहीर निषेध करतो.
गुन्हेगारी प्रवृत्तीचे लोक जेव्हा कर्तव्य बजावणाऱ्या अधिकाऱ्यांवर हल्ले करतात, तेव्हा अशा प्रकारच्या भ्याड हल्ल्याने केवळ हल्ला झालेला अधिकारीच नव्हे तर संपूर्ण प्रशासनाचे मनोधैर्य खच्चीकरण होते. त्यामुळे अशा प्रकारच्या हल्ल्याचा संघटित निषेध करणे आणि हल्लेखोरांवर कठोर कारवाई करणे हाच यावरील उपाय आहे, असे नगरपरिषदेच्या कर निरीक्षक श्रद्धा वळवडे यांनी सांगितले.
३१ इंदापूर
इंदापूर नगरपरिषदेसमोर निषेध करताना नगरपरिषद अधिकारी व कर्मचारी.