जुन्नर: राज्यभरातून शिवजयंतीनिमित्त शिवप्रेमींचा ओघ वाढत असताना शिवजन्मभूमी जुन्नर शहर दिमाखात सजले आहे. आमदार शरद सोनवणे यांच्या संकल्पनेतून उभारण्यात आलेली भव्य प्रवेशद्वारे, आकर्षक रोषणाई आणि सांस्कृतिक उपक्रमांमुळे संपूर्ण शहरात उत्सवाचे वातावरण निर्माण झाले आहे.
बसस्थानकासमोर उभारण्यात आलेले ‘तुळजाभवानी’ त्रिमितीय प्रवेशद्वार तसेच जुन्नर-आपटाळे मार्गावरील छत्रपती शिवाजी महाराज स्मारक, जुन्नर परिसरातील शिवकालीन शौर्य मावळा प्रवेशद्वार सर्वांचे लक्ष वेधून घेत आहे. स्मारकाजवळून किल्ले शिवनेरी कडे जाणाऱ्या रस्त्यावर शिवचरित्रावर आधारित प्रसंगांची मांडणी व तालुक्यातील पर्यटनस्थळांच्या एलईडी प्रतिमा पर्यटकांना आकर्षित करत आहेत.
मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार यांच्या उपस्थितीत शिवजयंती कार्यक्रमाला उत्साहात सुरुवात झाली. यावेळी शिवजन्मसोहळा साजरा करण्यात आला. तसेच छत्रपती शिवाजी महाराजांची पालखीतून ढोल ताशांचा गजरात मिरवणूक काढण्यात आली. तसेच सर्वांच्या वतीने शिवरायांना शासकीय मानवंदना देण्यात आली.
छत्रपती शिवाजी महाराज स्मारकापासून बसस्थानक चौकापर्यंत रस्त्याच्या दुतर्फा आकर्षक रोषणाई करण्यात आली असून, भगवे ध्वज आणि महाराजांच्या प्रतिमांनी परिसर भारावून गेला आहे. शहरातील छत्रपती शिवाजी महाराज प्रवेशद्वारापासून शिवनेरी पायथ्यापर्यंत संपूर्ण मार्ग सजवण्यात आला आहे.
सांस्कृतिक कार्यक्रम, क्रीडा स्पर्धांचा जल्लोष
शंकरराव बुट्टे-पाटील विद्यालयाच्या मैदानावर सांस्कृतिक कार्यक्रमांसाठी प्रशस्त व्यासपीठ व बैठक व्यवस्था उभारण्यात आली आहे. बचत गटांच्या उत्पादनांसाठी तसेच खाद्यपदार्थांच्या दालनांनी मैदान गजबजले आहे. याच ठिकाणी कबड्डी व कुस्ती स्पर्धांचे आयोजन करण्यात आले आहे. रावसाहेब बुट्टे-पाटील बैलगाडा घाटावर दोन दिवसांच्या बैलगाडा शर्यतीत सुमारे ३६० बैलगाड्यांचा सहभाग नोंदवला गेला आहे. पुणे जिल्हा परिषद व जुन्नर पंचायत समिती यांच्यावतीने वक्तृत्व, बुद्धिबळ, पोवाडे गायन, निबंध, गडचढण व चित्रकला स्पर्धा सुरू आहेत. जुन्नर वनविभागाने शिवनेरी परिसरात स्वच्छता मोहीम राबवली असून, सार्वजनिक बांधकाम विभागाकडून ‘शिवकुंज’ स्मारकातील देखभाल अंतिम टप्प्यात असल्याची माहिती वनपरिक्षेत्र अधिकारी प्रदीप चव्हाण यांनी दिली.
सुरक्षा, सुविधा आणि एलईडी स्क्रीनची व्यवस्था
शिवजयंती सोहळ्यासाठी येणाऱ्या भाविकांच्या सोयीसाठी प्रमुख रस्त्यांवर मोठ्या प्रमाणात पार्किंग व्यवस्था करण्यात आली आहे. पोलिस यंत्रणेने सौरऊर्जेवर चालणारे फिरते सूचनाफलक उभारले असून, दुचाकीवरील पेट्रोलिंग पथके तैनात केली आहेत. आरोग्य विभागाने मार्गावर आरोग्य पथके सज्ज ठेवली आहेत, तर जिल्हा परिषदेच्यावतीने स्वच्छतागृहे व विद्युत व्यवस्था उपलब्ध करून देण्यात आली आहे. किल्ले शिवनेरीवरील मुख्य शासकीय सोहळ्यासाठी प्रवेशिका आवश्यक असून, मर्यादित कालावधीसाठीच प्रवेश देण्यात येणार आहे. शिवभक्तांना सोहळा पाहता यावा, यासाठी शिवाई मंदिर, पायथ्याशी दत्त मंदिर तसेच छत्रपती शिवाजी महाराज स्मारकाजवळ एलईडी स्क्रीनची व्यवस्था करण्यात आली आहे.
Web Summary : Junnar magnificently celebrates Shivjayanti with grand entrances, lighting, and cultural events. The Shivjanm ceremony was held with Chief Minister and Deputy Chief Minister present. Various cultural programs, sports competitions, and facilities are available for devotees.
Web Summary : जुन्नर में शिवजयंती भव्य प्रवेश द्वार, रोशनी और सांस्कृतिक कार्यक्रमों के साथ मनाई गई। मुख्यमंत्री और उपमुख्यमंत्री की उपस्थिति में शिवजन्म समारोह आयोजित किया गया। भक्तों के लिए विभिन्न सांस्कृतिक कार्यक्रम, खेल प्रतियोगिताएं और सुविधाएं उपलब्ध हैं।