पुणे : नोव्हाव्हॅक्स ही अमेरिकी कंपनी आणि सीरम इन्स्टिटयूट ऑफ इंडिया यांनी विकसित केलेल्या लसीची परिणामकारकता प्रभावी असल्याचे सिद्ध झाले आहे. त्यामुळे आता भारतात या लसीच्या चाचण्या सुरू करण्यासंदर्भात आम्ही अर्ज केला आहे, अशी माहिती ‘सीरम’चे सीईओ अदर पुनावाला यांनी शनिवारी (दि. ३०) ट्विट करून दिली. जून २०२१ पर्यंत ‘कोव्होव्हॅक्स’च्या प्रत्यक्ष वापराला सुरुवात होईल, असेही त्यांनी ट्विटमध्ये म्हटले आहे.
नोव्हाव्हॅक्स या अमेरिकी कंपनीच्या कोरोना प्रतिबंधक लसीबाबतचे संशोधन व उत्पादन करण्याबाबत त्या कंपनीने ‘सिरम’शी ऑगस्ट २०२० मध्ये करार केला आहे. नोव्हाव्हॅक्स कंपनीच्या लसीचे भारतात उत्पादन करण्याचा विशेष हक्क या कराराद्वारे ‘सिरम’ला मिळाले आहेत. उच्च मध्यम किंवा उच्च उत्पन्न असलेले देश वगळता अन्य देशांसाठी कोरोना साथीच्या काळात ‘सिरम’ला नोव्हाव्हॅक्स लसीचे उत्पादन करण्याचा हक्क या कराराद्वारे मिळाला. सर्व परवानग्या मिळून चाचण्या सुरळीत पार पडल्यास कोव्होव्हॅक्स ही भारतात आपत्कालीन वापरासाठी परवानगी मिळणारी तिसरी लस असेल. याआधी अँस्ट्रेझेनिका या कंपनीची कोव्हीशिल्ड आणि भारत बायोटेकच्या कोव्हॅकसिनला परवानगी मिळाली आहे.
ब्रिटनमध्ये नुकत्याच पार पडलेल्या मानवी चाचण्यांमध्ये कोव्होव्हॅक्स लसींची परिणामकारकता ८९.३ टक्के इतकी असल्याचे सिद्ध झाले आहे. यामध्ये १८ ते ८४ या वयोगटातील १५ हजार स्वयंसेवकांवर लसीची चाचणी घेण्यात आली आणि त्याचे निकाल गुरुवारी जाहीर करण्यात आले. कोरोनाच्या नवीन स्ट्रेनवरही ही लस प्रभावी असल्याचे विविध संशोधनातून सिद्ध झाले आहे.