Savitribai Phule Pune University: देशातील टॉप १० युनिव्हर्सिटीमध्ये सावित्रीबाई फुले पुणे विद्यापीठ सहावे

द वीक’ने केलेल्या सर्वेक्षणातून ही बाब पुढे आली असून १००० गुणांपैकी ६७९ गुण सावित्रीबाई फुले पुणे विद्यापीठाला मिळाले आहेत.

पुणे : ऑक्सफर्ड ऑफ दी ईस्ट अशी ख्याती असलेल्या सावित्रीबाई फुले पुणे विद्यापीठाने देशातील टाॅप टेन युनिव्हर्सिटीमध्ये सहावा क्रमांक पटकावला आहे. शासकीय आंतरविद्याशाखीय विद्यापीठाच्या यादीत हे यश मिळवले आहे. ‘द वीक’ने केलेल्या सर्वेक्षणातून ही बाब पुढे आली आहे. यात १००० गुणांपैकी ६७९ गुण सावित्रीबाई फुले पुणे विद्यापीठाला मिळाले आहेत.

यात पहिल्या पाच विद्यापीठांमध्ये अनुक्रमे जवाहरलाल नेहरू युनिव्हर्सिटी, बनारस हिंदू युनिव्हर्सिटी, युनिव्हर्सिटी ऑफ दिल्ली, जाधवपूर युनिव्हर्सिटी, युनिव्हर्सिटी ऑफ काेलकाता या विद्यापीठाने क्रमांक पटकावला असून, सहाव्या स्थानी सावित्रीबाई फुले पुणे विद्यापीठाने स्थान मिळवले आहे. याशिवाय पहिल्या दहा विद्यापीठात युनिव्हर्सिटी ऑफ हैदराबाद, आंध्रा युनिव्हर्सिटी, काेईमतूर येथील भरतियार युनिव्हर्सिटी, युनिव्हर्सिटी ऑफ मद्रास यांचा समावेश आहे.

सावित्रीबाई फुले पुणे विद्यापीठाने ‘द वीक-हांसा रिसर्च सर्वेक्षण २०२५ इंडियाज बेस्ट युनिव्हर्सिटीज’मध्ये सरकारी बहुविद्याशाखीय विद्यापीठ श्रेणीत ६७९ गुणांसह ६ वे स्थान पटकावले आहे. विद्यापीठाचे कुलगुरू, समर्पित शिक्षक आणि व्यवस्थापन परिषद सदस्यांच्या सांघिक प्रयत्नांमुळेच हे मजबूत शैक्षणिक स्थान प्राप्त झाले आहे. आम्ही सर्वजण विद्यार्थ्यांच्या यशावर लक्ष केंद्रित करून विद्यापीठाच्या शैक्षणिक उत्कृष्टतेची खात्री करण्यासाठी कटिबद्ध आहेत. - डाॅ. पराग काळकर, प्र-कुलगुरू, सावित्रीबाई फुले पुणे विद्यापीठ