वरंध घाटात दरड कोसळली

भोर तालुक्यातील पर्यटकांना खुनावणाऱ्या वरंध घाटात सकाळी १० वाजता घाटातील वाघजाई देवीच्या मंदिरापासून २०० मी. अंतरावर महाडकडे जाताना मोठी दरड कोसळली.

नेरे : भोर तालुक्यातील पर्यटकांना खुनावणाऱ्या वरंध घाटात सकाळी १० वाजता घाटातील वाघजाई देवीच्या मंदिरापासून २०० मी. अंतरावर महाडकडे जाताना मोठी दरड कोसळली. रविवारच्या सुटीमुळे पर्यटकांची फार मोठ्या प्रमाणावर गर्दी झाली होती. दरड कोसळल्यामुळे साधारणपणे तीन तास वाहतूक ठप्प झाली. एकेरी मार्ग वाहतुकीस सार्वजनिक बांधकाम उपविभाग भोर यांनी तत्काळ प्रयत्न करून मार्ग खुला करून दिला. या वेळी वाहनचालकांनी सहकार्य केले. वरंध घाटात ५ ते ६ दिवस पावसाची संततधार चालू असल्यामुळे डोंगर ओले झालेले आहेत. त्यामुळे दरड कोसळलेली आहे. या नंतरही दरड कोसळण्याची दाट शक्यता आहे, असे शाखा अभियंता आर. पी. कोल्हे आणि पी. एम. जाधवर यांनी ‘लोकमत’ला माहिती देताना सांगितले. तरी वाहनचालकांनी घाटातून वाहने चालवताना सावधानता बाळगावी. घाटात जास्त वेळ वाहने उभी करू नयेत, असेही सांगण्यात आले. (वार्ताहर)