राजस्थानात पुणे पोलिसांची धडक कारवाई; तब्बल ४ कोटींचे एमडी केले उध्वस्त, आंतरराष्ट्रीय रॅकेटचा पर्दाफाश

या कारवाईत तब्बल १ किलो ९६० ग्रॅम एमडीसह ४ कोटी २७ लाख ९ हजार रुपयांचा मुद्देमाल जप्त करण्यात आला असून पुणे आणि राजस्थानमधील एकूण सहा आरोपींना अटक करण्यात आली आहे

पुणे : शहरात वाढत्या अंमली पदार्थांच्या तस्करीला आळा घालण्यासाठी पुणे पोलिसांनी थेट राजस्थानमध्ये जाऊन धडक कारवाई करत मेफेड्रॉन (एमडी) तस्करीचे आंतरराष्ट्रीय रॅकेट उद्ध्वस्त केले. या कारवाईत तब्बल १ किलो ९६० ग्रॅम एमडीसह ४ कोटी २७ लाख ९ हजार रुपयांचा मुद्देमाल जप्त करण्यात आला असून पुणे आणि राजस्थानमधील एकूण सहा आरोपींना अटक करण्यात आली आहे.

खराडी पोलिस ठाणे आणि गुन्हे शाखेच्या अंमली पदार्थ विरोधी पथकाने संयुक्तपणे ही कारवाई केली. ३ फेब्रुवारी रोजी खराडी येथील सार्वजनिक रस्त्यावर एका कारमध्ये संशयास्पद हालचाली करणाऱ्या दोन तरुणांना पोलिसांनी पकडले. त्यांच्याकडे केलेल्या झडती दरम्यान २७ ग्रॅम एमडी त्यांच्याजवळ आढळून आले. त्यानंतर दोघा आरोपींना पोलिसांनी अटक केली. मोतीसिंह श्रवणसिंह राजपुरोहित (२८, रा. वाघोली) आणि हरिष सुजना रामदेवासी (२२, रा. वाघोली) अशी आरोपींची नावे आहेत. त्यांच्या ताब्यातून एमडीसह १२ लाख ४१ हजार रुपयांचा माल जप्त करण्यात आला. हे दोघे गिफ्ट शॉप चालवत असून मूळचे राजस्थानातील जोधपूरचे रहिवासी असल्याचे तपासात उघड झाले. गेल्या वर्षभरापासून ते अंमली पदार्थांच्या व्यवहारात सक्रिय असल्याचे स्पष्ट झाले.तपासादरम्यान योगेश ऊर्फ मनीष बाबुराम बिष्णोई (३०) हा राजस्थानहून एमडी घेऊन येणार असल्याची माहिती पोलिसांना मिळाली. वरिष्ठ पोलिस निरीक्षक संजय चव्हाण यांच्या पथकाने ७ फेब्रुवारी रोजी सापळा रचून त्याला पकडले. त्याच्याकडून १५१ ग्रॅम एमडी आणि ३० लाख २० हजार रुपयांचा मुद्देमाल जप्त झाला. चौकशीत त्याचा मावस भाऊ सचिन ऊर्फ एस.के. रमेशकुमार बिष्णोई (२०) हा देखील व्यवहारात सहभागी असल्याचे समोर आले. त्याला हडपसर परिसरातून ताब्यात घेण्यात आले असून त्याच्याकडून एमडी विक्रीतून मिळालेले ४ लाख ६५ हजार रुपये जप्त करण्यात आले.

या साखळीत पुढे अमित सुनील घुले (४०, रा. मांजरी) याचे नाव निष्पन्न झाले. पोलिसांनी त्याला अटक करून त्याच्याकडून ३९८ ग्रॅम एमडी, दोन मोबाईल आणि एकूण १ कोटी २ लाख ४० हजार रुपयांचा मुद्देमाल जप्त केला. प्रकरणाचा गांभीर्याने आढावा घेत पोलिस आयुक्त अमितेश कुमार, पोलिस सह आयुक्त रंजन कुमार शर्मा, अपर पोलिस आयुक्त मनोज पाटील व पोलिस उपायुक्त सोमय मुंडे यांनी राजस्थानमधील मुख्य वितरकांपर्यंत पोहोचण्याचे निर्देश दिले. त्यानुसार वरिष्ठ पोलिस निरीक्षक संजय चव्हाण, अमली पदार्थ विरोधी पथकाचे पोलिस निरीक्षक पंडित रेजीतवाड, उपनिरीक्षक राहुल कोळपे, मनोज बागल, नितीन राठोड असे एकूण ५ अधिकारी व २० अंमलदार यांचे वेगवेगळी ५ पथके तयार करुन त्यांना ९ फेब्रुवारी रोजी राजस्थान येथे पोहचले.

राजस्थानमध्ये तपास करताना रतनलाल किष्णाराम जाठ (२०, रा. बलदेवनगर, बालोतरा) याला ११ फेब्रुवारी रोजी अटक करण्यात आली. त्याच्याकडून तब्बल २ कोटी ७६ लाख ८० हजार रुपयांचे १ हजार ३८४ ग्रॅम एमडी जप्त करण्यात आले. तसेच पुण्यातून फरार असलेला आणि या रॅकेटमध्ये सक्रिय असलेला रामकरण जाट ऊर्फ चौधरी ऊर्फ सियाग (रा. कपोरिया ओसीया, जोधपूर) याला १२ फेब्रुवारी रोजी अटक करण्यात आली.

आरोपींकडून एकूण १ हजार ९६० ग्रॅम एमडी, ३ कोटी ९२ लाख रुपयांचा अमली पदार्थ, तसेच ३५ लाख ९ हजार रुपयांचे मोबाईल, फॉर्च्यूनर गाडी आणि अन्य साहित्य असा एकूण ४ कोटी २७ लाख ९ हजार रुपयांचा ऐवज जप्त करण्यात आला आहे. या कारवाईमुळे शहरातील अंमली पदार्थविरोधी मोहिमेला मोठे यश मिळाले आहे. या कारवाईत पोलिस अंमलदार श्रीकांत शेडे, महेश नाणेकर, सचिन पाटील, सुरेंद्र साबळे, निलम कर्पे, अंकुश जोगदंड, लालु कर्हे, राहुल जोशी, अमोल सोनवणे, संदीप जाधव, तांत्रिक विश्लेषक प्रविण गव्हाणे हे देखील सहभागी होते. पुढील तपास सहायक पोलिस निरीक्षक रवींद्र गोडसे करत आहेत.