Maharashtra highway accident : पुणे–सोलापूर महामार्गावर भीषण अपघात, ३ कामगारांचा मृत्यू

या भीषण धडकेत क्रुझरमधील तीन कामगारांचा जागीच मृत्यू झाला

इंदापूर ( पुणे जि. ) -  पुणे-सोलापूर राष्ट्रीय महामार्गावर मंगळवारी (दि. १७) सकाळी सुमारे पावणेनऊ वाजण्याच्या सुमारास झालेल्या भीषण अपघातात तिघांचा जागीच मृत्यू झाला. लोणी देवकर गावच्या हद्दीत क्रूझर आणि ट्रक यांची समोरासमोर धडक होऊन ही दुर्घटना घडली. मृतांमध्ये प्रमोद बाळासो खवळे (वय २८, रा. मदनवाडी, ता. इंदापूर), शशांक कोटिया (वय ३२, गौतमनगर, गिरड, ग्वालियर, मध्यप्रदेश) आणि विजयसिंह राजपूत (वय ३५, त्रिलोकनगर, मध्यप्रदेश) यांचा समावेश आहे.

अधिकच्या माहितीनुसार, लोणी देवकर औद्योगिक वसाहतीतून कामगारांना आणण्यासाठी निघालेल्या पांढऱ्या रंगाच्या क्रूझरचा (एमएच १४ एलबी १६१३) पुढील उजव्या बाजूचा टायर अचानक फुटला. त्यामुळे चालकाचे वाहनावरील नियंत्रण सुटले आणि गाडी रस्त्याच्या दुभाजकावरून विरुद्ध दिशेला जाऊन सोलापूरकडे येणाऱ्या ट्रकला (एमएच १२ वाय क्यू ६६०३) जोरदार धडकली. धडकेनंतर ट्रकनेही दुभाजक ओलांडत क्रूझरला महामार्गाच्या कडेला दाबले, ज्यामुळे अपघात अधिक गंभीर झाला. या दुहेरी धडकेत तिघांचा जागीच मृत्यू झाला.

घटनेची माहिती मिळताच महामार्ग मदत केंद्राचे पथक तात्काळ घटनास्थळी दाखल झाले. क्रेन व हायड्राच्या मदतीने अपघातग्रस्त वाहने बाजूला करून वाहतूक सुरळीत करण्यात आली. इंदापूर पोलिसांनी पुढील तपास सुरू केला आहे.