Pune: रस्त्यावर पिचकारी मारणाऱ्या अतिहुशार लोकांना महापालिकेचा दणका; ४ महिन्यांत ६९ लाखांचा दंड वसूल

सार्वजनिक जागी थुंकणे, लघवी करणे, कचरा जाळणे, कचऱ्याचे सुका आणि ओला असे वर्गीकरण न करणे, नदीत राडारोडा टाकणे अशा नागरिकांवर दंडात्मक कारवाई केली जाणार

पुणे : पुणे महापालिकेच्या घनकचरा व्यवस्थापन विभागाच्या वतीने सार्वजनिक जागी थुंकणे, कचरा जाळणे, अस्वच्छता करणे, अशा कारणांसाठी दंडात्मक कारवाई केली जाते. त्यानुसार गेल्या चार महिन्यांत ११ हजार ०४७ लोकांना दंड करत ६९ लाख ३६ हजार ५४९ रुपयांचा दंड वसूल केला आहे. त्यामुळे नागरिकांना पिचकारी मारणे महागात पडणार आहे.

पुणे महापालिकेने सार्वजनिक जागी स्वच्छता राखण्यासाठी स्वच्छता उपविधी तयार केली आहे. त्या नियमानुसार अस्वच्छता करणाऱ्या नागरिकांस दंडात्मक कारवाई केली जाते. यामध्ये सार्वजनिक जागी थुंकणे, लघवी करणे, कचरा जाळणे, कचऱ्याचे सुका आणि ओला असे वर्गीकरण न करणे, नदीत राडारोडा टाकणे, अशा गोष्टींचा समावेश आहे. यासाठी १८० रुपयांपासून ते पाच हजार रुपयांपर्यंतच्या दंडाची तरतूद आहे. सार्वजनिक ठिकाणी थुंकण्याबाबद्दल ७७ लोकांकडून ७७ हजार दंड वसूल करण्यात आला. सार्वजनिक ठिकाणी लघवी करणाऱ्या २ हजार ४४५ जणांकडून ४ लाख ८९ हजार रुपये वसूल केले. कचरा जाळणाऱ्या १२ लोकांकडून ६० हजार वसूल करण्यात आले. कचऱ्याचे वर्गीकरण न केल्याबद्दल ९०७ लोकांकडून २ लाख ४२ हजार ४०० रुपये वसूल करण्यात आले. सार्वजनिक ठिकाणी अस्वच्छता करणाऱ्या ७ हजार १४७ लोकांकडून ३८ लाख १९ हजार ८८४ रुपये वसूल करण्यात आले. बल्क वेस्ट जनरेटर कचरा प्रक्रिया प्रकल्प बंदबाबत ३६ जणांकडून १ लाख ८० हजार ४०० रुपये वसूल केले. बांधकाम राडारोडा टाकणाऱ्या ७६ लोकांकडून ५ लाख ४८ हजार २०० रुपये वसूल करण्यात आले आहेत. २७८ लोकांवर प्लास्टिकबद्दल कारवाई करत १४ लाख २० हजार वसूल करण्यात आले. त्यांच्याकडून ९९४ किलो प्लास्टिक जमा करण्यात आले आहेत. या प्रकारे ११ हजार ०४७ लोकांना दंड करत महापालिकेने ६९ लाख ३६ हजार ५४९ रुपयांचा दंड वसूल केला आहे.

सार्वजनिक ठिकाणी स्वच्छता ठेवणे ही नागरिकांचीही जबाबदारी आहे. त्यामुळे नागरिकांनी सार्वजनिक ठिकाणी थुंकणे, अस्वच्छता करणे, कचरा जाळणे, या गोष्टी करून नयेत; अन्यथा दंडात्मक कारवाईला सामोरे जावे लागेल. – अविनाश संकपाळ, उपायुक्त, घनकचरा व्यवस्थापन विभाग, महापालिका