कर्णकर्कश फटाक्यांसारखा 'सायलेन्सर'चा वापर, पुण्यात बुलेटचालकांवर कारवाईचा बडगा

हौशी गाडी चालकांकडून बुलेटच्या सायलेन्सरमध्ये फेरबदल करून मॉडिफाइड सायलेन्सरचा वापर मोठ्या प्रमाणात केला जातो

धनकवडी/चंदननगर : कर्णकर्कश सायलेन्सरचा वापर करणाऱ्या बुलेटचालकांविरुद्ध भारती विद्यापीठ वाहतूक विभागाच्या पोलिसांनी कारवाईचा बडगा उगारला असून त्यांच्याविरुद्ध दंडात्मक कारवाई करत पन्नास हजार रुपयांचा दंड वसूल केला आहे. यामध्ये ५० बुलेट चालकांविरुद्ध कारवाई करण्यात आली आहे. तसेच सायलेन्सर जप्त करण्यात आले. पोलिसांनी केलेल्या कारवाईचे स्वागत नागरिकांनी केले आहे.

शहरासह दक्षिण उपनगरात गाड्यांच्या बाबतीत हौशी कलाकारांची काही कमतरता नाही. याच हौशी गाडी चालकांकडून बुलेटच्या सायलेन्सरमध्ये फेरबदल करून मॉडिफाइड सायलेन्सरचा वापर मोठ्या प्रमाणात केला जातो, कर्णकर्कश आवाज, फटाक्यांसारखा आवाज, ध्वनिप्रदूषण आणि नागरिकांच्या तक्रारीची दखल घेत भारती विद्यापीठ वाहतूक विभागाच्या वतीने कारवाईची मोहीम राबविण्यात आली. यात ५० बुलेट दुचाकी वाहने ताब्यात घेत या गाड्यांचे मॉडिफाइड सायलेन्सर काढून घेण्यात आले. व नियमांचे उल्लंघन केल्याप्रकरणी बुलेटचालकांवर वाहतूक अंमलदार यांच्यामार्फत ५० हजार रुपये दंडात्मक कारवाई करून या वाहनाचे मूळ सायलेन्सर बसवून तसेच ज्या गाड्यांना नंबर प्लेट नाही अशा गाड्यांवर कारवाई करून त्यांना नंबर प्लेट बसवून ही वाहने वाहनमालक यांच्या ताब्यात देण्यात आली असल्याचे सहायक पोलिस निरीक्षक प्रियांका गोरे यांनी सांगितले.

भारती विद्यापीठ परिसरात अनेक नामांकित शैक्षणिक संस्था आहेत. त्यामुळे विद्यार्थी-विद्यार्थिनींची मोठ्या प्रमाणात वर्दळ सुरू असते, तसेच ज्येष्ठ नागरिकांची ये-जाही सुरू असते. सातारा रस्ता आणि कात्रज देहूरोड बाह्यवळण मार्गावरून मोठ्या प्रमाणात वाहतूक सुरू असते, अशा परिस्थितीत सायलेन्सर बदलून त्यांचा कर्णकर्कश आवाज करत जाणाऱ्या रोडरोमिओच्या शायनिंगचा वृद्ध, लहान मुले, आजारी व्यक्तींना नाहक त्रास सहन करावा लागत असल्याने यापुढेही ही कारवाई सुरू ठेवण्यात येणार असल्याचे भारती विद्यापीठ वाहतूक विभागाच्या सहायक पोलिस निरीक्षक प्रियांका गोरे यांनी सांगितले.

खराडी पोलिसांचा ‘फटाके सायलन्सरवर’ बुलडोझर

खराडी परिसरातील मॉडीफाइड सायलन्सर बसवून कर्णकर्कश आवाज करत नागरिकांना त्रास देणाऱ्या बुलेटस्वारांवर अखेर खराडी पोलिसांनी धडक कारवाई करत सायलन्सरवर बुलडोझर चालविला. पोलिसांनी ठिकठिकाणी सापळा रचून तब्बल ४५ बुलेट व इतर दुचाकी जप्त करीत संबंधितांवर मोटार वाहन कायद्यानुसार कारवाई केली. जप्त वाहनांवरील मॉडीफाइड सायलन्सर काढून त्याठिकाणी कंपनीचे मूळ सायलन्सर बसविण्यात आले असून जप्त केलेल्या सायलन्सरवर बुलडोझर चालवून नायनाट करण्यात आला. खराडी पोलिस ठाण्याच्या हद्दीत काही तरुणांकडून बुलेट मोटारसायकलींना कंपनीचे सायलन्सर बदलून मॉडीफाइड सायलन्सर बसवले जात होते. या सायलन्सरमधून फटाक्यांसारखा मोठा आवाज निर्माण करून परिसरात दहशत निर्माण केली जात असल्याच्या अनेक तक्रारी नागरिकांकडून वारंवार खराडी पोलिसांना दिल्या होत्या. या पार्श्वभूमीवर वरिष्ठ पोलिस निरीक्षक संजय चव्हाण यांच्या मार्गदर्शनाखाली पोलिसांनी विशेष मोहीम राबवत पेट्रोलिंगदरम्यान सापळे लावून कारवाई केली.