‘स्पा’च्या नावाखाली वेश्याव्यवसाय; दोन महिलांची सुटका, मॅनेजरसह मालकांविरोधात गुन्हा दाखल

पोलिसांना खबऱ्याकडून माहिती मिळाल्यावर बनावट ग्राहक पाठवून खात्री केली असता स्पाच्या नावाखाली वेश्याव्यवसाय सुरू असल्याचे पुढे आले

पुणे : आनंदपार्क, वडगावशेरी येथील एका कॉम्प्लेक्समध्ये स्पाच्या नावाखाली वेश्याव्यवसाय सुरू असल्याचा प्रकार समोर आला आहे. याबाबत चंदननगर पोलिसांनी कारवाई करत दोन पीडित महिलांची सुटका केली, तर ‘स्पा’च्या मॅनेजरसह मालकांविरोधात गुन्हा दाखल केला आहे. याबाबत पोलिस शिपाई वर्षा नामदेव सावंत यांनी चंदननगर पोलिस ठाण्यात फिर्याद दिली आहे. त्यानुसार ‘स्पा’ची मॅनेजर रिया रंजीत शर्मा (२१, रा. चंदननगर), स्पा मालक संदीप त्रिपाठी (रा. वडगाव शेरी) आणि राहुल जाधव (रा. पुणे) यांच्याविरोधात भारतीय न्याय संहितेच्या विविध कलमांसह अनैतिक व्यापार (प्रतिबंध) अधिनियमानुसार गुन्हा दाखल करण्यात आला आहे.

पोलिसांनी दिलेल्या माहितीनुसार, वडगाव शेरी येथील आनंद पार्कमधील शैलेश कॉम्प्लेक्स या इमारतीच्या पहिल्या मजल्यावर सृष्टी स्पा आहे. या स्पाचे मालक त्रिपाठी आणि जाधव हे दोघे आहेत. ते मॅनेजर रिया शर्मा हिच्यामार्फत या ठिकाणी वेश्याव्यवसाय चालवत होते. याबाबत पोलिसांना खबऱ्याकडून माहिती मिळाली. त्यानुसार बनावट ग्राहक पाठवून खात्री केली असता, तेथे स्पाच्या नावाखाली वेश्याव्यवसाय सुरू असल्याचे पुढे आले. पोलिसांनी बुधवारी (दि. २८) दुपारी साडेतीनच्या सुमारास या ठिकाणी छापा टाकून हा प्रकार उघडकीस आणला. शर्मा हिच्यामार्फत दोन महिलांना जादा पैशांचे प्रलोभन दाखवून आरोपींनी त्यांना वेश्याव्यवसाय करण्यास भाग पाडले. तसेच त्यांच्याकडून वेश्याव्यवसाय करून घेऊन त्यातून पैसे मिळवल्याप्रकरणी तिघांविरुद्ध पोलिसांनी गुन्हा दाखल केला आहे. पुढील तपास चंदननगर पोलिस करत आहेत.