“सुनेत्रा काकींमध्ये अजित काकांना बघतो”; दोन्ही NCP विलीनीकरणावर रोहित पवारांचे मोठे विधान

NCP SP Group MLA Rohit Pawar News: अजितदादा गेले, या दुःखातून अजूनही पवार कुटुंब सावरलेले नाही. अजितदादांचे स्वप्न पूर्ण होईल, असे रोहित पवार यांनी सांगितले.

NCP SP Group MLA Rohit Pawar News:अजित पवार यांची मनापासून इच्छा होती की, कुटुंब म्हणून सर्वांनी एकत्र आले पाहिजे. अजितदादा त्यासाठी प्रयत्न करत होते. सुप्रिया सुळे आणि शरद पवार हेही त्यादृष्टीने प्रयत्न करत होते. अजित पवारांचे निधन झाल्यानंतर आता १३ दिवस पवार कुटुंब एकत्रित आहे. आता याही पुढे अजित पवार यांचे जे स्वप्न आहे की, कुटुंब म्हणून एकत्र राहिले पाहिजे, असेच काहीसे होईल, असा आशावाद राष्ट्रवादी काँग्रेस शरद पवार गटाचे नेते आणि अजित पवार यांचे पुतणे रोहित पवार यांनी व्यक्त केला.

जिल्हा परिषद निवडणुकीसाठी मतदानाचा हक्क बजावल्यानंतर रोहित पवार पत्रकारांशी बोलत होते. शरद पवार, रोहित पवार आणि पार्थ पवार यांच्यात एक बैठक झाली होती. यावर बोलताना रोहित पवार म्हणाले की, शरद पवार यांनी आम्हाला मार्गदर्शन केले. ते मार्गदर्शन भावनिक होते. येत्या काळात काही गोष्टी कराव्या लागणार आहेत. परंतु, त्या राजकीय नसतील. अजितदादांच्या स्मरणार्थ काही गोष्टी करायच्या आहेत. त्या कशा करता येतील, याबाबत चर्चा झाली, अशी माहिती रोहित पवारांनी दिली. 

सुनेत्रा काकींमध्ये अजित काकांना बघतो

सुनेत्रा काकींमध्ये मी अजित काकांना बघतो. राष्ट्रीय अध्यक्षपदाची रिक्त झालेली जागा सुनेत्रा काकींनाच मिळावी, ही कुठेतरी इच्छा आहे. सुनेत्रा काकी, पार्थ, जय, आम्ही या दुःखातून सावरलो नाही. राजकीय विचार मनामध्ये येत नाहीत. ही घटना दुर्दैवी आहे. मला राजकीय विचार करण्याची क्षमता येईल, तेव्हा आम्ही स्पष्ट सांगू. पवार कुटुंबियात कुठली राजकीय चर्चा झालेली नाही. ९ तारखेनंतर त्यावर पवार कुटुंबात चर्चा होईल. विलीनीकरण का होणार होते, कशासाठी होणार होते, दादांच्या मनात काय इच्छा होती, त्याला राजकीय अंग आहे की भावनिक अंग आहे, हे मी १२ तारखेला सांगणार आहे, असे रोहित पवार म्हणाले. 

दरम्यान, या मतदान केंद्रावर आल्यानंतर सर्व राजकीय आठवणी माझ्या डोळ्यासमोर आल्या. अजितदादांसोब अनेकदा चर्चा होत असे. त्या सर्व गोष्टी आठवू लागल्या. दादांचे जे स्वप्न होते की, कार्यकर्त्यांची निवडणूक आहे .जास्तीत जास्त कार्यकर्ते आपल्या विचाराचे निवडून आले पाहिजेत, ही दादांची इच्छा होती. मतदार त्यांची इच्छा पूर्ण करतील, जास्त उमेदवार दादांची निवडून येतील, असा विश्वास रोहित पवारांनी व्यक्त केला.