वनाज परिवार सोसायटीच्या मीटर रूमला भीषण आग; सर्व मीटर जळून खाक, चौघींची बाल्कनीतून उडी

सुदैवाने या आगीत कोणतीही जीवितहानी झाली नसून दोन चिमुकल्या तसेच एक ज्येष्ठ नागरिक यांना काही प्रमाणात दुखापत झाली आहे

कोथरूड : कोथरूड येथील वनाज परिसरातील वनाज परिवार सोसायटीच्या मीटर रूममध्ये गुरुवारी दुपारी तीनच्या सुमारास अचानक आग लागली. ही आग इतकी भीषण होती की संपूर्ण मीटर रूम जळून खाक झाली असून, सोसायटीतील वीजपुरवठा खंडित झाला आहे. दुपारी अंदाजे तीन वाजण्याच्या सुमारास ही घटना घडली. वीज मीटरमधूनच शॉर्ट सर्किटमुळे आग लागल्याचा प्राथमिक अंदाज व्यक्त करण्यात येत आहे. आगीमुळे जवळपास असंख्य मीटर बॉक्स पूर्णतः जळून गेले आहेत. यामुळे सोसायटीतील अनेक घरांमध्ये वीजपुरवठा ठप्प झाला आहे. 

घटनेची माहिती मिळताच अग्निशमन दलाचे दोन बंब घटनास्थळी दाखल झाले आणि आगीवर त्वरित नियंत्रण मिळवण्यात आले. सुदैवाने या आगीत कोणतीही जीवितहानी झाली नाही. मात्र, येथील दोन चिमुकल्या तसेच एक ज्येष्ठ नागरिक यांना काही प्रमाणात दुखापत झाली आहे. विद्युत उपकरणांचे मोठे आर्थिक नुकसान झाले आहे. ही आग विझवण्यासाठी परिसरातील नागरिक संजय काळे, दीपक कुल, भाऊसाहेब सातपुते, विशाल उभे,महेश कांबळे, अभिजीत यादव,महेश यादव, संजय खाडे, विकास जाधव, मिलिंद देशपांडे, यांनी अग्निशमन दलांच्या जवान सह आग विझवण्यासाठी मदत केली. यावेळी कोथरूड पोलीस, अग्निशामक दलाचे जवान आणि महावितरणचे अधिकारी घटनास्थळी उपस्थित असून, पुढील तपास सुरु आहे.

दलाच्या जवानांनी प्रथम आग विझवून प्रत्येक मजल्यावरील फ्लॅटमध्ये कोणी अडकलेले आहेत का याचा शोध घेतला. वरील मजल्यावरील काही लोक बाल्कनीमध्ये होते. त्यांना सुरक्षितपने बाहेर काढले. तिसऱ्या मजल्यावरील फ्लॅटमधील चौघी जणी आगीला घाबरून दुसऱ्या मजल्यावरील बाल्कनीमध्ये उडी मारताना एका मुलीच्या पायाला दुखापत झाल्याचे कळते आहे.