खेड तालुक्यात बिबट्याचा थरार; वृद्ध महिलेवर हल्ला करून तोडले शरीराचे लचके

रात्रीच्या सुमारास नरभक्षक बिबट्याने हल्ला करून ४०० फूट शेतात फरफटत नेले

ठळक मुद्दे परिसरात बिबट्याच्या धुमाकुळाने ग्रामस्थ भयभीत

राजगुरुनगर : खेड तालुक्यातील वडगांव पाटोळे येथील साबळेवस्ती परीसरात मंगळवारी रात्रीच्या सुमारास बिबट्याने महिलेवर हल्ला करून महिलेस ठार मारले आहे. जनाबाई गडदे (वय६० )असे हल्ल्यात मृत पावलेल्या महिलेचे नाव आहे. मृत महिला साबळेवाडी परिसरात झोपडीत राहत होती.

रात्रीच्या सुमारास नरभक्षक बिबट्याने हल्ला करून ४०० फुट शेतात फरफटत नेले. नख आणि दाताने जखमा करून बिबट्याने शरीराचे लचके तोडले आहे. या घटनेत महिलेचा जागीच मृत्यू झाला. सकाळी ही घटना उघडकीस आली. वनविभागाच्या कर्मचाऱ्यांनी घटनास्थळी धाव घेत घटनेचा पंचनामा केला आहे. वडगाव पाटोळे येथे डोंगरालगत साबळे वस्ती आहे. या ठिकाणी नरभक्षक बिबट्याचा वावर आहे. अनेक दिवसांपासून वडगांव पाटोळे परीसरात बिबट्या माणसावर हल्ले करत होता. 

गेल्या काही दिवसांपासून बिबट्याच्या माणसांवर हल्ला करण्याच्या घटना वारंवार घडत आहेत. काही दिवसापूर्वी वडगाव-पाटोळे येथील गायकवाड वस्तीत सुभाष गायकवाड यांच्यावर बिबट्याने हल्ला करून गंभीर जखमी केले होते. या परिसरात बिबट्याच्या धुमाकुळाने ग्रामस्थ भयभीत झाले आहेत. बिबट्याकडून माणसांवर वारंवार हल्ला करण्याचे प्रकार घडू लागल्याने परिसरात दहशत पसरली आहे. दहशतीमुळे नागरिक घराच्या बाहेर पडायला सुद्धा घाबरू लागले आहेत.