धायरी: वाहन चोरी करण्याच्या उद्देशाने आलेल्या चोरट्यांनी वाहनमालकाच्या पोटात चाकू खुपसून गंभीर जखमी केले असल्याची घटना सिंहगड रस्ता परिसरातील नऱ्हे येथे घडली. प्रमोद किसन घारे (वय ३५, रा. सिद्धी संकल्प सोसायटी, भूमकर चौकाजवळ, नऱ्हे, पुणे) असे जखमी वाहनमालकाचे नाव आहे. याबाबत त्यांच्या पत्नीने सिंहगड रस्ता पोलीस ठाण्यात तक्रार दाखल केली.
याबाबत सविस्तर वृत्त असे की, सोमवारी पहाटे साडेतीनच्या सुमारास पार्किंगमधून कसला तरी आवाज ऐकू येत असल्याने प्रमोद घारे यांनी गॅलरीतून खाली पाहिले, तेव्हा त्यांना पार्किंगमध्ये त्यांच्या गाडीजवळ एक जण संशयास्पद काहीतरी करत होता. त्या वेळी ते खाली पार्किंगमध्ये उतरून गाडीजवळ गेले असता तो व्यक्ती गाडीचे लॉक तोडण्याचा प्रयत्न करत होती. त्या वेळी प्रमोद यांनी त्या व्यक्तीला पकडण्याचा प्रयत्न केला. दरम्यान या दोघांची झटापट पाहून दूर उभ्या राहिलेल्या अन्य तीन अज्ञात चोरट्यांनी प्रमोद यांना पकडून मारहाण करू लागले. ‘तू इथून निघून जा नाहीतर तुला मारून टाकीन. आम्ही लय टपकवलेत, आमच्या हातून मरू नकोस.’ असे म्हणत ते शिवीगाळ करू लागले. तेवढ्यात त्यातील एका चोरट्याने चाकू काढून प्रमोद यांच्या पोटात दोन वेळा खुपसला. यात ते गंभीर जखमी होऊन रक्ताच्या थारोळ्यात पडले. यानंतर चोरटे वॉल कंपाऊंडवरून उडी मारून पळून गेले. पहाटे साडेतीनपासून ते पहाटे सहा वाजेपर्यंत घारे पार्किंगमध्ये रक्ताच्या थारोळ्यात पडून होते. सकाळी फिरायला जाणाऱ्या एकाने त्यांना पाहिले, त्यानंतर हा प्रकार उघडकीस आला. त्यानंतर त्यांना रुग्णालयात दाखल केले.
याबाबत सिंहगड रस्ता पोलीस ठाण्यात अज्ञातांविरुद्ध गुन्हा दाखल केला आहे.
---------------------
मागील आठवड्यातही झाली होती चोरी
प्रमोद घारे राहत असलेल्या सोसायटीत मागील आठवड्यात मोठी घरफोडी झाली होती. त्या वेळीही चार चोरटे सीसीटीव्ही कॅमेरामध्ये कैद झाले आहेत. मात्र पोलिसांनी कोणतीच कारवाई केली नसल्याचा आरोप येथील रहिवाश्यांनी केला.