केडगाव स्टेशन परिसरात पहाटे गोळीबार; जमिनीच्या वादातून प्रकार, नागरिकांमध्ये खळबळ

लोकवस्तीमध्ये अशा प्रकारे गोळीबार झाल्यामुळे नागरिकांनी सुरक्षेबाबत चिंता व्यक्त केली आहे

केडगाव: केडगाव (ता. दौंड) : केडगाव स्टेशन परिसरात शनिवारी पहाटेच्या सुमारास गोळीबाराची घटना घडल्याने परिसरात मोठी खळबळ उडाली. मध्यवस्तीतील या घटनेमुळे नागरिकांमध्ये काही काळ भीतीचे वातावरण निर्माण झाले. प्राथमिक माहितीनुसार जमिनीच्या वादातून हा प्रकार घडल्याचा संशय व्यक्त केला जात आहे.

केडगाव पोलीस चौकीचे सहाय्यक पोलीस निरीक्षक किशोर वागज यांनी दिलेल्या माहितीनुसार, पुणे शहरातील गुन्हेगारी पार्श्वभूमी असलेल्या एका व्यक्तीने हवेत गोळीबार केल्याची चर्चा परिसरात आहे. पहाटेच्या शांततेत अचानक गोळीबाराचे आवाज ऐकू आल्याने परिसरातील नागरिक दचकले आणि अनेक जण घराबाहेर येऊन काय घडले याची माहिती घेऊ लागले. लोकवस्तीच्या भागातच हा प्रकार घडल्यामुळे काही काळ तणावाचे वातावरण निर्माण झाले होते.

घटनेची माहिती मिळताच यवत पोलीस स्टेशनचे अधिकारी व कर्मचारी तातडीने घटनास्थळी दाखल झाले. पोलिसांनी परिसराची पाहणी करून प्राथमिक चौकशी सुरू केली आहे. संबंधित व्यक्तींची माहिती गोळा करण्याचे काम सुरू असून या प्रकरणी गुन्हा दाखल करण्याची प्रक्रिया सुरू असल्याची माहिती पोलिसांकडून देण्यात आली.

दरम्यान, लोकवस्तीमध्ये अशा प्रकारे गोळीबार झाल्यामुळे नागरिकांनी सुरक्षेबाबत चिंता व्यक्त केली आहे. या घटनेचा सखोल तपास करून संबंधितांवर कठोर कारवाई करावी, अशी मागणी नागरिकांकडून केली जात आहे.