मूकबधिरही साधणार ‘अ‍ॅप’वरून संवाद

मूकबधिर व्यक्ती आणि सामान्य लोक यांचा मोबाईलवर संवाद जरा अवघडच! मूकबधिरांची साईनची भाषा, तर सामान्यांची मौखिक भाषा. पण, संवादाचा हा अडसर आता दूर होणार आहे

पुणे : मूकबधिर व्यक्ती आणि सामान्य लोक यांचा मोबाईलवर संवाद जरा अवघडच! मूकबधिरांची साईनची भाषा, तर सामान्यांची मौखिक भाषा. पण, संवादाचा हा अडसर आता दूर होणार आहे. कारण, विश्वकर्मा इन्स्टिट्यूट आॅफ इन्फॉर्मेशन टेक्नॉलॉजीच्या (व्हीआयआयटी) चार विद्यार्थिनींनी संशोधन करून मूकबधिर लोकांसाठी एक खास मोबाईल अ‍ॅड्रॉईड अ‍ॅप तयार केले आहे. हे अ‍ॅप मूकबधिर लोकांकडून वापरले जाणार्‍या सांकेतिक भाषेचे हिंदी भाषेत भाषांतर करेल व हिंदी भाषेचे सांकेतिक भाषेत. यामुळे सामान्य माणसे- ज्यांना सांकेतिक भाषा कळत नाही, तेदेखील मूकबधिरांचे म्हणणे समजू शकतील. अपेक्षा भट, शुभांगी येरोलकर, निशा अडवाणी व सायली बोरा अशी या अनोख्या अ‍ॅपची निर्मिती केलेल्या विद्यार्थिनींची नावे आहेत. त्या पदवीच्या अंतिम वर्षात शिकत असून, त्यांना एक प्रोजेक्ट बनवायचा असतो. त्याअंतर्गत त्यांनी या अ‍ॅपची निर्मिती केली. या अ‍ॅपबाबत त्या म्हणाल्या, हे अ‍ॅप संपूर्णत: हिंदी भाषा व भारतीय सांकेतिक भाषाशास्त्रावर अवलंबून आहे. हे अ‍ॅप वापरण्याकरिता इंग्रजी भाषा किंवा अमेरिकन सांकेतिक भाषा यांचे ज्ञान असण्याची गरज नाही. या संशोधनात महाविद्यालयातील निर्देशक डॉ. कैलास पाटील यांनी या विद्यार्थिनींना मार्गदर्शन केले. संस्थेच्या प्राचार्या डॉ. बिलावली करकरे यांनी विद्यार्थिनींचे कौतुक केले. व्हीआयआयटीतर्फे आधार मूकबधिर शाळेस हे अ‍ॅप असलेला एक मोबाईल भेट देण्यात आला आहे. (प्रतिनिधी)