लोकमत न्यूज नेटवर्क
पुणे : नगररचना विभागाचे निलंबित सहसंचालक हनुमंत नाझीरकर यांच्यावर नोकरीच्या काळात उत्पन्नापेक्षा अधिक बेकायदा अपसंपदा बाळगल्याप्रकरणी लाचलुचपत प्रतिबंधक विभागाने गुरुवारी तब्बल ४० हजार पानांचे पहिले दोषारोप पत्र न्यायालयात दाखल केले. उत्पन्नापेक्षा तब्बल १२०० टक्के अधिक ८२ कोटी ३४ लाख ३४ हजार ९३९ रुपये अधिक बाळगल्याचा आरोप या दोषारोपात करण्यात आला आहे.
हनुमंत नाझीरकर, संगीता नाझीरकर, गीतांजली नाझीरकर, भास्कर नाझीरकर, राहुल खोमणे, अनिल शिपकुळे, बाळासाहेब घनवट आणि विजयसिंह धुमाळ अशा ८ जणांवर लाचलुचपत प्रतिबंधक विभागाने गुन्हा दाखल केला आहे. त्यांच्यापैकी हनुमंत नाझीरकर आणि राहुल खोमणे यांना अटक करण्यात आली असून, ते दोघे ३० मार्चपासून न्यायालयीन कोठडीत येरवडा कारागृहात आहेत.
हनुमंत नाझीरकर हे नगररचना विभागामध्ये अमरावतीला सहसंचालक म्हणून कार्यरत होते. सध्या त्यांना निलंबित करण्यात आले आहे. २३ जानेवारी १९८६ ते १८ जून २०२० या ३४ वर्षामध्ये त्यांनी तब्बल ८२ कोटी ३४ लाख रुपयांची मालमत्ता लाचखोरीतून मिळविल्याचे उघड झाले आहे. त्यांच्या उत्पन्नापेक्षा ही मालमत्ता तब्बल ११६२ टक्के अधिक आहे.
हनुमंत नाझीरकर याच्या ३८ कंपन्या व त्यातील गुंतविलेला पैसा याविषयी दुसरे स्वतंत्र पुरवणी दोषारोपपत्र दाखल करण्यात येणार आहे. तसेच, त्याच्या २० बेनामी मालमत्ताही आढळून आल्या आहेत. त्याबाबतची वेगळी कारवाई आयकर विभागामार्फत करण्यात येत आहे. लाचलुचपत प्रतिबंधक विभागाच्या पथकाने आज सकाळी न्यायालय सुरू होण्यापूर्वीच ही सर्व कागदपत्रे न्यायालयात आणली होती. त्यामुळे कामकाज सुरू होताच ती दाखल करण्यात आली.
पत्नी, सासऱ्यांच्या नावावर मालमत्ता
लाचलुचपत प्रतिबंधक विभागाने आज हे दोषारोपपत्र शिवाजीनगर येथील न्यायालयात दाखल केले आहे. हनुमंत नाझीरकर याने ही मालमत्ता २०१० ते २०१६ दरम्यान आपली पत्नी आणि सासरे यांच्या नावावर खरेदी केली आहे. त्यातील किमती या त्याने ज्यावेळी या मालमत्ता खरेदी केल्या, त्यावेळच्या आहेत. या सर्व मालमत्ता मोक्याच्या ठिकाणी असल्याने आजच्या बाजारभावानुसार त्यांच्या किमती दुप्पट ते तिप्पट झाल्या असतील.