बाळहिरडा खरेदी सुरू करण्यासाठी बिरसा क्रांती दलाचे आंदोलन

कोरोना महामारीमुळे सर्व व्यवहार ठप्प झाल्यामुळे हिरडा खरेदी झाली नाही. दरवर्षी एप्रिल, मे महिन्यामध्ये बाळहिरडा झाडाला येतो. या महामारीत आदिवासी लोकांनी एप्रिल, मे या दोन महिन्यात बाळहिरडा गोळा केला व घरात साठवून ठेवला आहे. बाळ हिरडा खरेदी बंद असल्याने उपजीविकेसाठी हातात पैसे राहिले नाहीत. मुलाबाळाची लग्नाचा खर्च, शिक्षणाचा खर्च, कपडेलत्ता खर्च, खाण्यापिण्याचा खर्च, जाण्यायेण्याचा खर्च या सर्वांची चणचण भासू लागली आहे. हातावर पोट असल्याने बाळहिरडा हेच आदिवासी लोकांचे महत्त्वाचे पीक आहे. याची तत्काळ खरेदी सुरू करणे गरजेचे आहे. आदिवासी विकास विभागाच्या माध्यमातून आदिवासी महामंडळ स्थापन करण्यात आले आहे. हे आदिवासी महामंडळ आदिवासी शेतक-यांचा हिरडा, वरई, नाचणी, सावा, खुराचणी ही पिके दरवर्षी खरेदी करते. मात्र दोन वर्षांपासून कोणतीही माहिती न देता आदिवासी महामंडळाने बाळहिरडा खरेदी बंद केल्याने आदिवासी समाजाची नाहक गळचेपी होत आहे. त्यामुळे आदिवासी विकास महामंडळाने तत्काळ आदिवासी विविध कार्यकारी सोसायटीच्या माध्यमातून बाळहिरडा खरेदी सुरू करावी, अशी मागणी आंदोलनकर्त्यांनी केली.

यावेळी बिरसा क्रांती दलाचे राज्य उपाध्यक्ष विजय आढारी, खेड तालुका कार्याध्यक्ष हरिभाऊ तळपे, सचिव शशिकांत आढारी, उपाध्यक्ष संतोष भांगे, चिंधू आढळ, अभिजीत लांघी, महेश मराडे, नितीन गवारी, संजय लोंखडे, विष्णू शेळके आदी उपस्थित होते.

२३ घोडेगाव

जिल्हाधिकारी कार्यालयाबाहेर उपोषणास बसलेले बिरसा क्रांती दलाचे पदाधिकारी.