Bhushi Dam Lonavala: भुशी धरण ओव्हर फ्लो! १५ दिवस अगोदरच ओसंडून वाहू लागले, पर्यटकांमध्ये आनंदाचे वातावरण

Bhushi Dam Lonavala मागील वर्षी ३० जुन रोजी भुशी धरण भरले होते या वर्षी पंधरा दिवस अगोदरच धरण भरून ओसंडून वाहू लागले

लोणावळा : पावसाळ्यात पर्यटकांचे आकर्षण असलेले भुशी धरण हे १६ जून रोजी पहाटेच्या सुमारास ओव्हरफ्लो झाले व परिसरातील व्यावसायकांनी जल्लोष केला. मागील महिनाभरापासून पडणाऱ्या पावसामुळे धरणात पाण्याचा साठा वाढला होता. लोणावळ्यात रविवारी रात्री ते सोमवारी सकाळ पर्यंत १४३सेंमी(५. ६३ इंच) पावसाची नोंद करण्यात आली आहे. (Bhushi Dam Lonavala) 

आज सकाळपासूनच सहारा पुल धबधबा व भुशी धरणावर पर्यटकांनी मोठी गर्दी केली. सकाळच्या वेळेत  धरण ओव्हर फ्लो होऊन वाहू लागल्याने धरणाच्या पायर्‍यांवर बसून भिजण्याचा आनंद अाज (सोमवारी) पर्यटकांना घेता आला. मागील आठवड्यांपासून पर्यटक भुशी धरण भरण्याची वाट पाहत होते. धरणाचा पाणीसाठा तळाला असताना देखील पर्यटक धरणावर गर्दी करत होते. मागील आठवड्यापासून लोणावळा परिसरात सक्रिय झालेल्या पावसाने आज अखेर पर्यटकांची व स्थानिक व्यावसायिकांची प्रतिक्षा संपवली. मागील वर्षी ३० जुन रोजी भुशी धरण भरले होते या वर्षी पंधरा दिवस अगोदरच धरण भरून ओसंडून वाहू लागले आहे. 

लोणावळ्यातील भुशी धरण ओव्हर फ्लो...#Pune#lonavala#rainpic.twitter.com/7vF3kDBYee

— Lokmat (@lokmat) June 16, 2025

संततधार कोसळणार्‍या पावसामुळे डोंगरातील धबधबे मोठ्याप्रमाणात वाहू लागल्याने पर्यटकांचे आकर्षण असलेले भुशी धरणही ओव्हरफ्लो होऊन वाहू लागले. धरण‍ाच्या सांडव्यावरुन पायर्‍यांवर पाणी वाहू लागले आहे. पर्यटक याच क्षणाची आतुरतेने वाट पाहत असतात, ती प्रतीक्षा अखेर संपली आहे. त्यामुळे येत्या वीकेंडला जर तुम्ही पर्यटनासाठी बाहेर पडणार असाल, तर भुशी धरणाचा चांगला पर्याय आता उपलब्ध झाला आहे. वर्षा पर्यटनासाठी लोणावळ्यात पर्यटकांची मोठी गर्दी होत आहे. मागील दोन वीकेंडलाही लोणावळ्यात पर्यटकांची मोठी गर्दी होती. शनिवारी आणि रविवारी जोरात पाऊस असल्याने अनेकांना वाटत होते की भूशी धरण अोव्हरफ्लो होईल मात्र भुशी धरण भरलेलं नसल्यामुळे पर्यटकांना हवा तसा आनंद घेता आला नाही. पण आता भुशी धरणाच्या पायऱ्यांवर पाण्याचा आनंद घेण्याची इच्छा पूर्ण होणार आहे.आज (सोमवारी) धरणाच्या पायर्‍यांवरून पाणी अोसांडून वाहताच पर्यटकांनी यथेच्छ भिजण्याचा आनंद घेतला असून येथील लहान मोठ्या व्यावसायिकांनीही आनंद व्यक्त केला आहे.