डंपरच्या धडकेत दुचाकीस्वार तरुणीचा मृत्यू; बाणेरमधील घटना

डंपरचालक कोणतीही माहिती न देता, वैद्यकीय मदत न करता तेथून पळून गेला होता

पुणे: दुचाकीला भरधाव डंपरने दिलेल्या धडकेत एक तरुणीचा मृत्यू झाला, तर दुसरी तरुणी जखमी झाली. याप्रकरणी बाणेर पोलिस ठाण्यात डंपरचालक राहुल भीमराव राठोड (२४, रा. भोंडवे वस्ती, रावेत) याच्यावर गुन्हा दाखल करण्यात आला आहे. तेजल प्रकाश तायडे (२७, रा. तलासरी, जि. ठाणे) असे मृत तरुणीचे नाव आहे. याप्रकरणी प्राची जगन्नाथ पचांगे (२८, रा. डांगे चौक) हिने फिर्याद दिली आहे.

पोलिसांनी दिलेल्या माहितीनुसार, गुरुवारी (दि. १९) संध्याकाळी पाचच्या सुमरास प्राची आणि तेजल एका दुचाकीवरून गणेश मंदिर चौक येथून ज्युपिटर हॉस्पिटलकडे जाणाऱ्या रस्त्याने जात होत्या. भरधाव डंपरने त्यांच्या दुचाकीला जोराची धडक दिली. यात तेजल गंभीर जखमी झाली, तर प्राचीच्या हाताला, कपाळावर आणि हनुवटीला दुखापत झाली आहे. उपचारादरम्यान तेजलचा मृत्यू झाला. डंपरचालक राहुल हा कोणतीही माहिती न देता, वैद्यकीय मदत न करता तेथून पळून गेला. पोलिसांनी डंपर चालकाला अटक केली असून, पुढील तपास सहायक पोलिस निरीक्षक केकाण करत आहेत.