किरकोळ वादातून बससमोर दुचाकी आडवी लावली; पीएमपी चालकाच्या डोक्यात दगड घातला, मोबाईलही फोडला

दुचाकीस्वाराने किरकोळ वादातून दुचाकी पीएमपी बससमोर आडवी लावली. बीआरटी मार्गात दुचाकी लावून त्याने पीएमपी चालकाला शिवीगाळ करत डोक्यात दगड घातला

पुणे : पुणे-सातारा रस्त्यावरील बीआरटी मार्गातून निघालेल्या दुचाकीस्वाराने पीएमपी चालकाला मारहाण करून त्याच्या डोक्यात दगड घातल्याची घटना घडली. या प्रकरणी दुचाकीस्वाराविरोधात पर्वती पोलिसांनी गुन्हा दाखल केला. सुरेश विठ्ठल गुंठे (वय ४०, रा. कात्रज गाव) असे जखमी झालेल्या पीएमपी चालकाचे नाव आहे.

या प्रकरणी दुचाकीस्वार मन्सूर गफूर शेख (वय २४, रा. झांबरे वस्ती, बिबवेवाडी) याच्या विरोधात गुन्हा दाखल करण्यात आला आहे. याबाबत गुंठे यांनी पर्वती पोलिस ठाण्यात फिर्याद दिली आहे. पोलिसांनी दिलेल्या माहितीनुसार, लक्ष्मीनारायण चित्रपटगृह परिसरातून पीएमपी बस बीआरटी मार्गातून १४ मार्च रोजी सायंकाळी सहाच्या सुमारास निघाली होती. त्या वेळी दुचाकीस्वार मन्सूर शेख बीआरटी मार्गातून निघाला होता. दुचाकीस्वार शेखने किरकोळ वादातून दुचाकी पीएमपी बससमोर आडवी लावली. बीआरटी मार्गात दुचाकी लावून त्याने पीएमपी चालक गुंठे यांना शिवीगाळ केली. त्यांना मारहाण करून डोक्यात दगड घातला. गुंठे यांचा मोबाइलदेखील फोडला. त्यांच्या गळ्यातील चांदीची साखळी तोडून नुकसान केले. पुढील तपास सहायक पोलिस निरीक्षक जगताप करत आहेत.