सिंहगड रस्ता भागात ट्रकच्या धडकेत महाविद्यालयीन २० वर्षीय युवतीचा मृत्यू; ट्रक चालक फरार

सिंहगड रोडवरील तुकाईनगर परिसरात भरधाव ट्रकने दुचाकीस्वार युवतीला धडक दिली, अपघातात तिच्या डोक्याला गंभीर दुखापत झाली होती

पुणे : भरधाव ट्रकच्या धडकेत महाविद्यालयीन युवतीचा मृत्यू झाल्याची घटना सिंहगड रस्ता भागातील तुकाईनगर परिसरात घडली. या प्रकरणी सिंहगड रोड पोलिसांनी ट्रक चालकाविरोधात गुन्हा दाखल करण्यात आला. सई श्रीकांत भागवत (१९, रा.भन्साळी कॅम्पस, तुकाईनगर, वडगाव बुद्रुक, सिंहगड रोड) असे मृत्युमुखी पडलेल्या महाविद्यालयीन युवतीचा नावे आहे. या प्रकरणी ट्रक चालकाविरुद्ध गुन्हा दाखल करण्यात आला आहे. याबाबत दीपश्री श्रीकांत भागवत (४८) यांनी सिंहगड रोड पोलिस ठाण्यात फिर्याद दिली आहे.

पोलिसांनी दिलेल्या माहितीनुसार, सई एस.पी. महाविद्यालयात कला शाखेत द्वितीय वर्षात होती. गुरुवारी (दि. २६) दुपारी ती दुचाकीवरून घरी निघाली होती. सिंहगड रोडवरील तुकाईनगर परिसरात भरधाव ट्रकने दुचाकीस्वार सईला धडक दिली. अपघातात तिच्या डोक्याला गंभीर दुखापत झाली. अपघाताची माहिती मिळताच, सहायक पोलिस आयुक्त अजय परमार, सिंहगड रोड पोलिस ठाण्याचे वरिष्ठ पोलिस निरीक्षक दिलीप दाईंगडे यांनी घटनास्थळी भेट दिली. तिला तातडीने खासगी रुग्णालयात दाखल करण्यात आले. उपचाराच्या दरम्यान तिचा मृत्यू झाला. अपघातानंतर ट्रक चालक पसार झाला असून, त्याचा शोध घेण्यात येत आहेत. पोलिस उपनिरीक्षक कांजळे पुढील तपास करत आहेत.