पिंपरी चिंचवडमध्ये २ लाखांची विनापरवाना विदेशी दारू जप्त; तीन जणांना अटक

४०० बाटल्या व तीन मोबाइल फोन, असा एकूण २ लाख ४८० रुपये किमतीची विदेशी दारू व तीन मोबाइल फोन जप्त करण्यात आले

पिंपरी: गुन्हे शाखा युनिटने दोन लाख रुपये किमतीची विनापरवाना विदेशी दारू जप्त केली आहे आणि तीन जणांना अटक केली आहे. रामप्रसाद साहेबराव साळुंखे (वय ३३ वर्षे), तिलक हेमंत पटेल (वय २१ वर्षे, रा. वापी नानी तंबाडी, ता. पार्डी, जि. वलसाड, गुजरात) आणि अनिल रामसुरत यादव (वय २४ वर्षे, रा. गुजरात) यांना अटक करण्यात आली आहे.

पिंपरी-चिंचवड आयुक्तालयाच्या हद्दीतील अवैध धंदे समूळ उच्चाटन करण्यासाठी पोलिस आयुक्त विनय कुमार चौबे यांच्या मार्गदर्शनाखाली पोलिस निरीक्षक संतोष कसबे, सुनील जावळे, पोलिस अंमलदार सोमनाथ बोर्हाडे, सागर सूर्यवंशी, श्रीधन इचके, शशिकांत नांगरे, समीर काळे, निखिल फापाळे व राजकुमार इधारे असे पथक तयार करून दिघी पोलिस स्टेशन हद्दीत गस्त घालत होते. त्यावेळी बोर्हाडे यांना खबर मिळाली. दाभाडे सरकार चौकजवळील तापकीर यांच्या मालकीच्या शेतात एका शेडमध्ये रामप्रसाद साळुंखे व त्याचे दोन साथीदार विदेशी दारू विक्रीसाठी सज्ज होते. त्यानंतर गुन्हे शाखा युनिटने दाभाडे सरकार चौकजवळील तापकीर यांच्या शेतात, चहोली येथे सापळा लावून अवैध दारू विक्री करणाऱ्यांना पकडले.

रामप्रसाद साळुंखे, तिलक पटेल आणि अनिल यादव यांना ताब्यात घेतले. त्यांच्याकडे एकूण २० नग खाकी रंगाच्या बॉक्सची व दोन पांढऱ्या रंगाच्या गोणीत बाटल्या आढळून आल्या. ४०० बाटल्या व तीन मोबाइल फोन, असा एकूण २ लाख ४८० रुपये किमतीची विदेशी दारू व तीन मोबाइल फोन जप्त करण्यात आले. दिघी पोलिस स्टेशन येथे गुन्हा नोंदवण्यात आला आहे.