मृतांच्या कुटुंबीयांना पाच लाखांची मदत; घटनेची चौकशी करणार, गिरीश महाजन यांचे आश्वासन

जखमींच्या उपचाराचा सर्व खर्चही शासन करणार असून या घटनेची सखोल चौकशी करण्यात येईल

पिंपरी : कुंडमळा दुर्घटनेतील मृतांच्या कुटुंबीयांना राज्य शासनाच्या वतीने पाच लाखांची मदत करण्यात येणार आहे. तसेच जखमींच्या उपचाराचा सर्व खर्चही शासन करणार आहे. तसेच या घटनेची चौकशी करण्यात येईल, असे राज्याचे जलसंपदा तथा आपत्ती व्यवस्थापन मंत्री गिरीश महाजन यांनी सांगितले.

कुंडमळा येथे भेट देऊन परिस्थितीचा आणि बचाव कार्याचा मंत्री महाजन यांनी आढावा घेतला. विभागीय आयुक्त डॉ. चंद्रकांत पुलकुंडवार, पिंपरी-चिंचवडचे पोलिस आयुक्त विनय कुमार चौबे, पोलिस सह आयुक्त शशिकांत महावरकर, जिल्हाधिकारी जितेंद्र डुडी, जिल्हा परिषदेचे मुख्य कार्यकारी अधिकारी गजानन पाटील, उप विभागीय अधिकारी सुरेंद्र नवले, पोलिस उपायुक्त संदीप डोईफोडे, विशाल गायकवाड, तहसीलदार विक्रम देशमुख उपस्थित होते.

जखमींच्या नातेवाइकांशी संपर्क

कुंडमळा दुर्घटनेतील जखमींची नावे अधिकृतपणे जाहीर करण्यात आलेली नाहीत. जखमींच्या नातेवाइकांशी संपर्क साधण्याचे प्रशासनाकडून प्रयत्न सुरू आहेत. जखमींवर रुग्णालयांमध्ये उपचार सुरू आहेत.

पूल कोसळण्याचे कारण अद्याप अस्पष्ट

या पुलाची बांधणी किती वर्षांपूर्वी झाली होती, त्याची देखभाल कितपत केली जात होती, याबाबत सध्या काहीही स्पष्ट माहिती उपलब्ध नाही. स्थानिक प्रशासन आणि सार्वजनिक बांधकाम विभागाने या दुर्घटनेची चौकशी सुरू केली आहे.

यांनी दिली भेट

राज्याचे मंत्री गिरीश महाजन, खासदार सुप्रिया सुळे, आमदार रोहित पवार, सुनील शेळके, माजी मंत्री बाळा भेगडे, भंडारा डोंगर देवस्थान अध्यक्ष बाळासाहेब काशिद यांनी घटनास्थळाला भेट दिली.