आत्महत्या केलेल्याचा मृतदेह दूर नेऊन फेकला; पुरावा नष्ट करण्याचा उद्देश, महिलेसह प्रियकर गजाआड

आत्महत्येचा प्रकार उघडकीस आल्यानंतर पुरावा नष्ट करण्याच्या उद्देशाने महिलेच्या सांगण्यावरून मृतदेह मावळ तालुक्यातील दारूंब्रे गावच्या हद्दीत फेकून दिला

पिंपरी : प्रेमसंबंधातून नातेवाईक महिलेच्या त्रासाला कंटाळून एकाने आत्महत्या केल्यानंतर तिने पुरावा नष्ट करण्यासाठी प्रियकराच्या मदतीने मृतदेह दूर नेऊन फेकून दिला. थेरगावातील जगतापनगर येथे घडलेल्या या घटनेप्रकरणी नातेवाईक महिलेसह प्रियकराला अटक करण्यात आली आहे.

तय्युबशहा उस्मानशा (वय ४६, रा. जगतापनगर, थेरगाव, मूळ बुलढाणा) असे आत्महत्या केलेल्याचे नाव आहे. याबाबत त्यांचा मुलगा तोसीफ तय्युब शहा (वय १८) याने काळेवाडी पोलिस ठाण्यात फिर्याद दिली आहे. पोलिसांनी ३२ वर्षीय नातेवाईक महिलेसह तिचा प्रियकर साहिल कैलास घाडगे (वय २१) या दोघांना अटक केली आहे. अल्पवयीन मुलाच्या विरोधातही गुन्हा दाखल केला आहे.

फिर्यादी तोसीफ याचे वडील तय्युब यांची नातेवाईक असलेल्या महिलेचे साहिल याच्यासोबत प्रेमसंबंध आहेत. तय्युब गावी राहत असत. अधूनमधून ते थेरगाव येथे येत असत. मात्र, ते थेरगाव येथे आले की ती त्यांना सतत टोचून बोलत असे. तिच्या त्रासाला कंटाळून तय्युब यांनी १४ जून रोजी रात्री साडेनऊच्या सुमारास तिचा प्रियकर साहिलच्या घरात गळफास घेऊन आत्महत्या केली. हा प्रकार उघडकीस आल्यानंतर पुरावा नष्ट करण्याच्या उद्देशाने तिच्या सांगण्यावरून साहिल याने अल्पवयीन मुलाला सोबत घेऊन तय्युब यांचा मृतदेह मावळ तालुक्यातील दारूंब्रे गावच्या हद्दीत फेकून दिला. दरम्यान, मृतदेहाजवळ सापडलेल्या कागदपत्रांद्वारे त्यांची ओळख पटली. त्यानंतर तपासात खरा प्रकार उघडकीस आला.