रनवेवरून हवेत झेपावेपर्यंत सर्वकाही ठीक होते; हवेत गेले तरी... एअर इंडिया विमान अपघातावर मोठी अपडेट

Air India Ahmadabad Plane Crash: ब्लॅक बॉक्स अमेरिकेला नेण्यात आला आहे. त्यात असलेल्या सर्व गोष्टी डाऊनलोड करण्यात आल्या आहेत. त्यांचा अभ्यास सुरु आहे.

अहमदाबाद विमान अपघाताबाबत एक महत्वाची अपडेट येत आहे. ब्लॅक बॉक्स अमेरिकेला नेण्यात आला आहे. त्यात असलेल्या सर्व गोष्टी डाऊनलोड करण्यात आल्या आहेत. त्यांचा अभ्यास सुरु आहे. अशातच न्यूयॉर्क टाईम्सने तज्ञ, माजी पायलट, आवाजाचे तज्ञ यांच्याशी बोलून एअर इंडियाचे विमान कोसळतानाचा व्हिडीओ, आवाज याचे विश्लेषण केले आहे. यानुसार विमान उड्डाण करेपर्यंत विमानात कोणताही बिघाड नव्हता असा दावा करण्यात आला आहे.

विमान सुरक्षा तज्ञ, माजी वैमानिक, तपासकर्ते आणि ऑडिओ तज्ञांच्या मदतीने केलेल्या विश्लेषणात असे समोर आले की, विमानाने उड्डाण केले, रनवेवरून वेग घेतला ते हवेत झेपावले हे सर्व सामान्य होते. त्यात कोणताही बिघाड जाणवला नाहीय. विमान हवेत गेल्यानंतर बिघाड सुरु झाला आहे.

उड्डाणापूर्वी विमानाने विंग फ्लॅप्स आणि स्लॅट्स उघडले आणि जनरल पॉइंटवरून उड्डाण करण्यासाठी धावपट्टीची संपूर्ण लांबी देखील वापरली गेली. परंतू, उड्डाणाच्या काही सेकंदानंतरही लँडिंग गियर पूर्णपणे बंद झाला नव्हता.

तज्ञांनुसार विमानाचे उड्डाण सामान्य होते. जमिनीवरून धावताना विमानाला इंजिनने दगा दिला किंवा थ्रस्ट मिळाला नाही असे व्हिडिओ व आवाजावरून जाणवले नाही.

तसेच या विमानाने यापूर्वी हा रनवे काही दिवसांपूर्वी सातवेळा वापरला होता. त्यात उड्डाणाला सुरुवात करण्याचे ठिकाणही तेच होते, असे सीसीटीव्ही फुटेज आणि फ्लाइट डेटा विश्लेषणातून स्पष्ट होत आहे. यानुसार या विमानाची आधीची सात उड्डाणे काही वेगळी नव्हती.

जेव्हा विमान हवेत झेपावले तेव्हा सुरुवातीला चढाईचा वेग बराचसा सामान्य वाटत होता, असे माजी वैमानिक जॉन कॉक्स यांनी म्हटले आहे.

टेकऑफ केल्यानंतर, वैमानिक लँडिंग गियर ओढतात. लँडिंग गियर टेकऑफनंतर पुढच्या चाकाच्या खाली स्थितीत दिसत आहे. ही प्रक्रिया कॉकपिटमधून सुरु झाली परंतू ती मध्येच अडकली. कदाचित पॉवर सप्लाय बिघाडामुळे याचा हायड्रॉलिक पॉवरवर परिणाम झाला असावा असा अंदाज राष्ट्रीय वाहतूक सुरक्षा मंडळाचे माजी सदस्य जॉन गोग्लिया यांनी व्यक्त केला आहे.

इलेक्ट्रिकल, हायड्रॉलिक किंवा इंजिन पॉवर फेल्युअर झाल्यास, आपत्कालीन लँडिंगसाठी वीज पुरवण्यासाठी विमानाच्या अंडरबॉडीमधून रॅम एअर टर्बाइन नावाचा पर्यायी उर्जा स्रोत सुरु होतो. क्रॅश व्हिडिओमध्ये ऐकू येणारा एक विशिष्ट आवाज याचे पुरावे देत आहे. हा आवाज ९७% पेक्षा जास्त वेळा आपत्कालीन टर्बाइन सक्रिय झाल्याच्या घटनेशी जुळतो आहे.

टेकऑफनंतर इंजिन निकामी झाल्याचे संकेत मिळत आहेत. अनेकदा इंजिन निकामी झाल्यावर विमान झुकते किंवा बाजूच्या हालचाली करते. पायलट किंवा विमानाची यंत्रणा ते दुरुस्त करते. दोन्ही व्हिडिओंमध्ये असे काहीही दिसले नाही.

धक्के देणाऱ्या थ्रस्टचे कोणतेही चिन्ह नाही. रडार विक्षेपण नाही. इंजिनमधून धूर किंवा आग नाही. याचाच अर्थ विमानाची शक्ती एकाएकी संपली होती. दोन्ही इंजिन एकाच वेळी निकामी झाले. याला दोनच कारणे असू शकतात, दूषित इंधन स्रोत, टेकऑफपूर्वी उड्डाण पॅरामीटर्सचे चुकीचे इनपुट यासारखी कारणे असू शकतात, असे मत माजी एफएए अन्वेषक जेफ गॅझेटी यांनी म्हटले आहे.