सोन्या-चांदीची चमक ओसरली! सर्वोच्च स्तरावरून दरात मोठी घसरण; आता नफा कमावण्याची वेळ?

Gold Investment : गेल्या काही काळापासून सोन्या-चांदीच्या दरातील चढ-उताराने गुंतवणूकदारांचे लक्ष वेधले आहे. आठवड्याभरात सोने-चांदीच्या किमती झपाट्याने कमी होत आहेत.

गेल्या १८ महिन्यांत सोन्या-चांदीने गुंतवणूकदारांना बंपर परतावा दिला आहे. रुपयाच्या संदर्भात विचार केल्यास, सोन्याचे दर १००% तर चांदीचे दर तब्बल २००% वाढले आहेत.

जानेवारी २०२६ मध्ये उच्चांकी स्तर गाठल्यानंतर आता किमती खाली येत आहेत. आंतरराष्ट्रीय बाजारपेठेत चांदी तिच्या सर्वोच्च दरापेक्षा ३६.६३% तर सोने ७.८% स्वस्त झाले आहे.

जागतिक तणाव, अमेरिकेची व्यापार धोरणे, महागाई आणि जगभरातील मध्यवर्ती बँकांनी केलेली मोठी खरेदी यामुळे सोन्या-चांदीचे भाव गगनाला भिडले होते. चांदीचा वापर सौर पॅनेल आणि ईव्हीमध्ये होत असल्याने तिला औद्योगिक मागणीही मोठी आहे.

भारतीय गुंतवणूकदारांनी शेअर बाजाराऐवजी सोन्या-चांदीला पसंती दिली आहे. जानेवारीत मौल्यवान धातूंच्या ईटीएफ मधील गुंतवणूक ३३,५०३ कोटींवर पोहोचली, जी इक्विटी फंडातील गुंतवणुकीपेक्षा (२४,०२९ कोटी) अधिक आहे.

अनेक तज्ज्ञांच्या मते, ज्यांनी गेल्या दीड वर्षात स्वस्त दरात सोने-चांदी खरेदी केली आहे, त्यांच्यासाठी आता 'नफा वसुली' करण्याची ही योग्य वेळ आहे. अल्पावधीत पुन्हा मोठी तेजी येण्याची शक्यता कमी असल्याचे तज्ज्ञ मानतात.

जे नवीन गुंतवणूकदार आहेत आणि ज्यांना गुंतवणूक सुटण्याची भीती वाटत आहे, त्यांनी एकदम मोठी रक्कम न गुंतवता 'एसआयपी'च्या माध्यमातून टप्प्याटप्प्याने गुंतवणूक करावी.

सोन्या-चांदीच्या विक्रमी आयातीमुळे भारताची व्यापार तूट जानेवारीत ३४.६ अब्ज डॉलर्स या तीन महिन्यांच्या उच्चांकावर पोहोचली आहे. सोन्याची आयात ४.५ पटीने तर चांदीची आयात २.३ पटीने वाढली आहे.

आयात वाढत असली तरी सरकारला यंदा ८६० अब्ज डॉलर्सच्या विक्रमी निर्यातीचा विश्वास आहे. सेवा निर्यात प्रथमच ४१० अब्ज डॉलर्सच्या पार जाण्याची शक्यता असून अमेरिकेकडून मागणी वाढण्याचे संकेत मिळत आहेत.