अंबानींच्या अँटिलियाला कडवी टक्कर! 'या' अब्जाधीश राजकारण्याची इमारत अँटिलियापेक्षा उंच आणि अलिशान

Most Expensive Real Estate : देशात सर्वात अलिशान आणि महाग घरं म्हटलं की कोणाच्याही ओठांवर उद्योगपती मुकेश अंबानी यांचं नाव येतं. मात्र, लवकरच ही ओळख पुसली जाण्याची शक्यता आहे.

मुंबईतील अल्टामाउंट रोड हा देशातील सर्वात महागड्या आणि अलिशान परिसरांपैकी एक म्हणून ओळखला जातो. याच रस्त्यावर आशियातील सर्वात श्रीमंत व्यक्ती मुकेश अंबानी यांचे जगप्रसिद्ध आणि जगातील सर्वात महागडे खासगी निवासस्थान 'अँटिलिया' उभे आहे. २७ मजली अँटिलिया (४,५३२ चौ.मी.) नेहमीच चर्चेत असते.

पण, तुम्हाला माहीत आहे का, याच अँटिलियाच्या अगदी समोर एक दुसरी इमारत आहे, जी उंची आणि भव्यतेमध्ये अँटिलियाला थेट टक्कर देते? या इमारतीचे मालक दुसरे कोणी नसून, एक अब्जाधीश व्यावसायिक आणि सक्रिय राजकारणी आहेत.

अँटिलियासमोर उभी असलेली ही ४३ मजली गगनचुंबी इमारत 'लोढा अल्टामाउंट' या नावाने ओळखली जाते. गोवालिया टँकजवळील फोर्जेट हिल रोडवर ही इमारत आहे.

या टॉवरचे बांधकाम प्रसिद्ध मालमत्ता विकासक आणि मंत्री आणि भाजपचे नेते मंगल प्रभात लोढा यांनी केले आहे. लोढा समूह (आता मॅक्रोटेक डेव्हलपर्स) ने या टॉवरला अत्याधुनिक सुविधांनी सुसज्ज केले आहे. यात एकूण ५२ अलिशान अपार्टमेंट्स आहेत, जे ४३ मजल्यांमध्ये विभागलेले आहेत.

मंगल प्रभात लोढा हे केवळ अब्जाधीश व्यावसायिक नाहीत, तर ते सक्रिय राजकारणी देखील आहेत. त्यांनी १९८० मध्ये मुंबईत रिअल इस्टेटचा व्यवसाय सुरू केला, जो आज देशातील सर्वात मोठ्या विकासक समूहांपैकी एक आहे.

फोर्ब्सच्या अंदाजानुसार, ५ जानेवारी २०२५ पर्यंत त्यांची एकूण संपत्ती १२ अब्ज डॉलरपेक्षा जास्त आहे, ज्यामुळे त्यांचा समावेश भारतातील सर्वात श्रीमंत व्यक्तींच्या यादीत होतो.

लोढा अल्टामाउंटची रचना आणि भव्यता या इमारतीला अँटिलियापेक्षा अधिक आकर्षक बनवते. ४३ मजली लोढा अल्टामाउंट ही २७ मजली अँटिलियापेक्षा उंच आहे. ही इमारत पूर्णपणे काळ्या काचेची बनलेली असून, तिला एक आधुनिक आणि आकर्षक लूक देते.

यात स्विमिंग पूल, जिम, स्पा आणि जलद लिफ्ट्स सारख्या फाइव्ह स्टार सुविधा आहेत. या इमारतीमध्ये अँटिलियाच्या तुलनेत अपार्टमेंट्सची संख्या कमी असल्याने, गोपनीयतेवर अधिक लक्ष केंद्रित करण्यात आले आहे.

अल्टामाउंट रोड हा केवळ राहण्याचा पत्ता नसून, तो संपत्ती आणि प्रतिष्ठेचे प्रतीक आहे. या रस्त्यावर अँटिलिया आणि लोढा अल्टामाउंट यांसारख्या इमारतींमुळे मोठी स्पर्धा पाहायला मिळते.