रस्त्याच्या दुरावस्थेने घेतला तरुणाचा बळी; पाथरी तालुक्यातील घटना
By लोकमत न्यूज नेटवर्क | Published: July 27, 2021 12:11 PM2021-07-27T12:11:34+5:302021-07-27T12:21:57+5:30
नातेवाईकांनी बैलगाडीमधून तरुणाला उपचारासाठी नेले.
- विठ्ठल भिसे
पाथरी ( परभणी ) : वाघाळा गाव अंतर्गत असणाऱ्या पारधी वस्तीवरील एका तरुणाचा रस्त्याच्या दुरावस्थेने बळी घेतल्याची खळबळजनक घटना सोमवारी ( दि. २६ ) सायंकाळी उशिरा घडली आहे. राजेभाऊ रामा पवार ( ३२ ) असे वेळीस उपचार न मिळाल्याने मृत झालेल्या तरुणाचे नाव आहे.
पाथरी तालुक्यातील वाघाळा गावापासून 3 किमी अंतरावर पारधी वस्ती आहे. या वस्तीला जाण्यासाठी अजूनही रस्ता नाही. पावसाळ्यात येथील ग्रामस्थांना वाघाळा गावाला येण्यासाठी मोठे हाल सहन करावे लागतात. या वर्षी ही पावसाळ्यात ग्रामस्थांचे हाल सुरू आहेत. दरम्यान, सोमवारी या वस्तीवरील राजेभाऊ रामा पवार या युवकाला दुपारी अचानक रक्ताची उलटी झाली .त्यामुळे त्याची प्रकृती खालावत गेली. त्याला वाघाळा येथील प्राथमिक आरोग्य केंद्रात उपचारासाठी नेण्यासाठी धावपळ सुरू झाली.
पावसाने रस्ता पूर्णपणे चिखलमय झाल्याने गाडी येणे शक्य नव्हते. शेवटी नातेवाईकांनी बैलगाडीमधून त्याला उपचारासाठी नेले. परंतु, चिखलमय रस्त्यातून घेऊन जाताना वेळ लागला. वाघाळा प्राथमिक आरोग्य केंद्राची रुग्णवाहिका पोहचण्याच्या आधीच युवकाचा मृत्यू झाला. रस्ता चांगला असता तर रुग्णाला वेळेत उपचार मिळाले असते, रस्त्याच्या दुरवस्थेने तरुणाचा बळी घेतला अशा संतप्त प्रतिक्रिया ग्रामस्थांनी व्यक्त केल्या.