अपघातग्रस्त ट्रॉलीला धडकल्याने दुचाकीस्वार ठार

सोनपेठ तालुक्यातील नैकोटा येथील विठ्ठल गणपत लांडगे व त्यांचा भाऊ अतुल गणपत लांडगे हे दोघे भाऊ नैकोटा येथून दुचाकीवरून गंगाखेडकडे येत होते. तेव्हा गंगाखेड- परळी रस्त्यावरील वडगाव पाटीजवळ पलटी होऊन अपघातग्रस्त झालेल्या उसाच्या ट्रॉलीला त्यांची दुचाकी क्रमांक एमएच २६ जे ५६१९ धडकली. या अपघातात दुचाकीवरील विठ्ठल गणपत लांडगे (३२) यांचा जागीच मृत्यू झाला. तर अतुल गणपत लांडगे (२६) हे जखमी झाले ही घटना मध्यरात्री १२ वाजेच्या सुमारास घडली. अपघाताची माहिती समजताच पोलीस निरीक्षक वसुंधरा बोरगावकर, सपोनि बालाजी गायकवाड, सपोउपनि टी. टी. शिंदे, जमादार बाबूराव घरजाळे आदींनी घटनास्थळी धाव घेऊन पंचनामा केला. त्यानंतर जखमी अतुल गणपत लांडगे यांना उपचारासाठी गंगाखेड उपजिल्हा रुग्णालयात दाखल केले. तर मयत विठ्ठल गणपत लांडगे यांच्यावर शवविच्छेदन करून २ मार्च रोजी सकाळी त्यांचा मृतदेह नातेवाईकांच्या स्वाधीन केला. याप्रकरणी नातेवाईकांनी फिर्याद न दिल्याने मंगळवार दुपारपर्यंत गुन्हा दाखल झाला नव्हता.