दिवसाढवळ्या घर फोडून अडीच तोळ्यांचे दागिने लंपास

गंगाखेड शहरात मागील काही दिवसांपासून चोरीच्या घटनांमध्ये वाढ झाली आहे. विशेष म्हणजे महिनाभरात दिवसाढवळ्या तीन घरफोड्या करून लाखोंचा ऐवज चोरट्यांनी लंपास केला. मात्र गंगाखेड पोलीस या घटनांकडे दुर्लक्ष करीत असले तरी नागरिकांमध्ये मात्र भीतीचे वातावरण निर्माण झाले आहे. गंगाखेड शहरातील नवीन नागरी भागात असलेल्या अरुणोदय कॉलनीतील रहिवासी राहुल महारुद्र व्यवहारे हे घराला कुलूप लावून शनिवारी बाजारात गेले होते. मात्र बाजारातून परत आल्यानंतर त्यांच्या घरातील सामान अस्ताव्यस्त दिसून आले. त्यामुळे आपल्या घरात चोरी झाल्याचा संशय व्यवहारे यांना आला. त्यानंतर त्यांनी घरातील कपाटाची पाहणी केली असता कपाटात ठेवलेले अडीच तोळ्यांचे दागिने चोरट्यांनी दिवसाढवळ्या लंपास केल्याचे त्यांना दिसून आले. या प्रकरणी राहुल व्यवहारे यांनी पोलीस ठाण्यात तक्रार देण्याचा प्रयत्न शनिवारी केला. मात्र पोलिसांनी जोपर्यंत सोने खरेदीच्या पावत्या दाखवणार नाहीत, तोपर्यंत गुन्हा दाखल करता येणार नाही, असे राहुल व्यवहारे यांना सांगितल्यानंतर त्यांना ठाण्यातून तक्रार न देताच परत यावे लागले.