कारच्या धडकेत दोघे जखमी

मानवत पोलीस ठाण्यात कार्यरत असलेले पोलीस कर्मचारी गोविंद लिंबाजी सोनवणे हे २४ जुलै रोजी सकाळी ११.३० च्या सुमारास एमएच २२ एआर ९१६९ क्रमांकाच्या दुचाकीवर पुतण्या लक्ष्मण सोनवणे यांच्यासोबत परभणी शहरातील आयकर कार्यालय परिसरातून जात असताना उड्डाणपुलाकडून वसमत रस्त्याच्या दिशेने जाणाऱ्या एमएच २२ एएम १४६० क्रमांकाच्या कारचालकाने त्यांच्या दुचाकीला जोराची धडक दिली. या अपघातात गोविंद सोनवणे व त्यांचा पुतण्या लक्ष्मण सोनवणे हे जखमी झाले. उपस्थित नागरिकांनी त्यांना उपचारासाठी शहरातील खासगी दवाखान्यात दाखल केले. तेथून जिल्हा सामान्य रूग्णालयात दाखल केले. याबाबत गोविंद सोनवणे यांनी २६ जुलै रोजी नवा मोंढा पोलीस ठाण्यात फिर्याद दिली. त्यावरून एमएच २२ एएम १४६० क्रमांकाच्या कार चालकाविरोधात गुन्हा दाखल करण्यात आला आहे.